آرمی چیف سے روسی سفیر کی ملاقات/ آپریشن ردالفساد دہشت گردی کے خاتمے میں اہم کردار ادا کریگا،الیکسے یوریوچ دیدوف

پاکستان اور روس کی افواج کے درمیان تعاون کے فروغ سے علاقائی سیکیورٹی پر مثبت اثرات مرتب ہونگے،جنرل قمر جاوید باجوہ

منگل 28 فروری 2017 14:53

آرمی چیف سے روسی سفیر کی ملاقات/ آپریشن ردالفساد دہشت گردی کے خاتمے ..

راولپنڈی (اُردو پوائنٹ اخبارتازہ ترین - این این آئی۔ 28 فروری2017ء) چیف آف آرمی سٹاف جنرل قمر جاوید باجوہ نے کہاہے کہ پاکستان اور روس کی افواج کے درمیان تعاون کے فروغ سے علاقائی سیکیورٹی پر مثبت اثرات مرتب ہونگے۔آئی ایس پی آر سے جاری بیان کے مطابق چیف آف آرمی سٹاف جنرل قمر جاوید باجوہ سے پاکستان میںروسی سفیر الیکسے یوریوچ دیدوف نے منگل کو جی ایچ کیو میں ملاقات کی۔

ملاقات کے دوران خطے کی سیکیورٹی سے متعلق امور پر تبادلہ خیال کیا گیا ۔

(جاری ہے)

روسی سفیر نے پاکستان میں دہشت گردی کے حالیہ واقعات کی مذمت کرتے ہوئے اپنے ملک کی طرف سے دلی رنج وغم کا اظہار کیا۔ انہوں نے دہشت گردی کیخلاف جنگ اور اقتصادی ترقی کیلئے پاکستان کی کوششوں کو سراہا۔ روسی سفیر نے آپریشن ردالفساد کو سراہتے ہوئے کہاکہ یہ آپریشن پاکستان سے دہشت گردی کے خاتمے میں اہم کردار ادا کریگا۔

آرمی چیف نے دہشت گردی کے واقعات پر روس کی تشویش، پاکستانی کوششوں کے اعتراف اور دونوں ممالک اور افواج کے درمیان جاری تعاون پرروسی سفیر سے تشکر کااظہار کیا۔ جنرل قمر جاوید باجوہ نے کہاکہ پاکستان اور روس کی افواج کے درمیان تعاون کے فروغ سے علاقائی سیکیورٹی پر مثبت اثرات مرتب ہونگے۔