وفاقی وزیر داخلہ چوہدری نثار خان کی زیر صدارت ای سی او سمٹ سیکیورٹی کے حوالے سے اجلاس، پلان کی منظوری دی گئی

پیر 27 فروری 2017 19:52

وفاقی وزیر داخلہ چوہدری نثار خان کی زیر صدارت ای سی او سمٹ سیکیورٹی ..
اسلام آباد ۔ (اُردو پوائنٹ اخبارتازہ ترین - اے پی پی۔ 27 فروری2017ء) وفاقی وزیر داخلہ چوہدری نثار علی خان کی زیر صدارت ای سی او سمٹ سیکیورٹی کے حوالے سے اجلاس منعقد ہوا جس میں راولپنڈی اور اسلام آباد انتظامیہ اور پولیس کے اعلی حکام نے شرکت کی ۔ترجمان وزارت داخلہ کے مطابق وزیر داخلہ کی زیر صدارت ہونے والے اجلاس کے دوران ای سی او سمٹ کے لئے سیکیورٹی پلان کی منظوری دی گئی جس کے مطابق دورانِ سمٹ پاکستان آنے والے سربراہانِ مملکت، سربراہانِ حکومت اور غیر ملکی وفود کو فول پروف سیکیورٹی فراہم کی جائے گی۔

راولپنڈی اور اسلام آباد کے شہریوں کی سہولت کے لئے وزیرِ داخلہ کی ہدایت پر جڑواں شہروں میں یکم مارچ کو مقامی تعطیل جبکہ اٹھائیس فروری کو ایک بجے کے بعد تعلیمی اداروں اوردفاتر میں چھٹی کر دی جائے گی۔

(جاری ہے)

دورانِ سمٹ جڑواں شہروں کے لئے ٹریفک پلان کی منظوری بھی دی گئی جس کے مطابق 28فروری سہ پہر سے یکم مارچ رات تک کشمیر ہائی وے زیرو پوائنٹ سے سرینا چوک تک عام ٹریفک کے لئے بند رہے گی۔

یہ اقدامات سیکیورٹی کی ضروریات کے ساتھ ساتھ ٹریفک کی بلا تعطل روانی کو یقینی بنانے اور شہریوں کو تکلیف سے بچانے کی غرض سے کیے جا رہے ہیں۔ مری کشمیر سے آنے والی ٹریفک کنونشن سنٹر سے فیض آباد کے ذریعے کشمیر ہائی وے زیرو پوائنٹ تک رسائی حاصل کرے گی۔ اسی طرح گولڑہ سے آنے والی ٹریفک کو زیرو پوائنٹ سے فیض آباد کی جانب موڑ دیا جائے گا۔

ای سی او اجلاس کی اہمیت کے پیش نظر وزارتِ داخلہ کا جڑواں شہروں کے رہائشیوں سے تعاون کرنے کی اپیل کی گئی ہے ۔وزیر داخلہ چوہدری نثار علی خان نے کہا کہ وی آئی پی سیکیورٹی کو یقینی بنانے اور ٹریفک کو متبادل راستوں سے رواں رکھنے کے ساتھ ساتھ اس بات کو بھی یقینی بنایا جائے کہ شہریوں کو کم سے کم پریشانی کا سامنا کرنا پڑے۔انہوں نے کہا کہ اسی سی او سمٹ کی سیکیورٹی محض انتظامی معاملہ ہی نہیں بلکہ پاکستان کے امیج کا سوال ہے۔

متعلقہ عنوان :