محمد نواز شریف زرعی یونیورسٹی میں مشاورتی اجلاس برائے انٹیلیکچوئل پراپرٹی مینجمنٹ کا انعقاد

ملتان۔25 فروری(اُردو پوائنٹ اخبارتازہ ترین - اے پی پی۔ 25 فروری2017ء) محمد نواز شریف زرعی یونیورسٹی ملتان میں مشاوراتی اجلاس برائے انٹیلیکچوئل پراپرٹی مینجمنٹ منعقد کیا گیا جس کی صدارت وائس چانسلر جامعہ پروفیسر ڈاکٹر آصف علی جبکہ مہمان خصوصی ڈپٹی کمشنر ملتان نادر چٹھہ تھے ۔مشاورتی اجلاس منعقد کروانے کا مقصد نئی ایجادات، نئی ورائٹی اور نئی چیزوں کے مالکانہ حقوق کی تقسیم کو زیادہ سے زیادہ منصفانہ بناناتھا مثلاً کسی بھی نئی چیز کی رائیلٹی فیکٹری مالک ، کسان یاادارے میں کس طرح تقسیم کرنی ہے تاکہ تمام سٹیک ہولڈز کو زیادہ سے زیادہ فوائدحاصل ہو سکیں، اس کے ساتھ ساتھ ایسا منظم سسٹم بھی بنانا جس میںمعیار پر کوئی سمجھوتا نہ ہو سکے اور قائدے قوانین پر عمل کیا جا سکے ۔

وائس چانسلر جامعہ پروفیسر ڈاکٹر آصف علی نے مشاوراتی اجلاس سے خطاب کرتے ہوئے کہاکہ ہم جامعہ میںایسا نظام لا رہے ہیں جس سے نئی ایجادات ہونگی اور ان ایجادات کا معاشرے کی ترقی کیلئے بہترین استعمال بھی ممکن ہو سکے گا ۔

(جاری ہے)

انہوں نے مزید کہاکہ نئی ایجادات کاپی رائیٹس، ٹریڈ مارک ،ٹریڈ سکربشن سے منظور شدہ ہوں تاکہ مالک کے حقوق کا تحفظ کیا جا سکے جو چیز مالک نے بنائی ہے اس پر مکمل اختیار بھی مالک کو ہی حاصل ہو سکے یہی سوچ ہم جامعہ میں بھی رائج کریں گے تاکہ جو محنت کر کے کچھ نیا ایجاد کرتا ہے تو اس کا فائدہ بھی اسے ملے ۔

تقریب سے خطاب کرتے ہوئے ڈپٹی کمشنر ملتان مسٹر نادر چٹھہ نے کہاکہ حکومت نئے ڈیم بنا رہی ہے ڈویلپمنٹ کی رفتار پہلے سے زیادہ تیز ہے جس سے جلد ہی فوائد حاصل ہو نا شروع ہو جائیںگے حکومت اس جامعہ کی تعمیر و ترقی اور اس کی بہتری کیلئے ہر ممکن مدد کرے گی ۔ یہ جامعہ اس خطے کی ضروریات کو مد نظر رکھ کر بنائی گئی ہے کیونکہ یہ خطہ زراعت کی پیداوار کے لحاظ سے اہم ہے اور زراعت کسی بھی ملک کی ترقی میں ریڑھ کی ہڈی کی حیثیت رکھتی ہے ۔

مشاوراتی اجلاس سے ممبر سینڈیکیٹ جامعہ ممتاز خا ن منیس ، وائس چانسلر محمد نواز شریف یونیورسٹی آف انجئیرنگ پروفیسر ڈاکٹر زبیر شیخ ،ممبر قومی اسمبلی سید جاوید علی شاہ، محمدخان ڈاھا ، ڈین فیکلٹی آف ایگریکلچر پروفیسر ڈاکٹر اشتیاق احمد رجوانہ نے بھی خطاب کیا ۔اس موقع پر ممبران صوبائی اسمبلی مہدی عباس لنگاہ ، چوہدری فضل الرحمن ، شوکت حیات خان بوسن ،بیگم خولہ امجد ، چیئر مین بلدیہ خانیوال مسعود مجید ڈاھا ، ملک آصف رجوانہ و دیگر موجود تھے۔