سعودی عرب میں سرد ہوائوں، گرج چمک کے ساتھ بارشوں کے نئے سلسلے کی پیشنگوئی

جدہ ۔ (اُردو پوائنٹ اخبارتازہ ترین - اے پی پی۔ 24 فروری2017ء) سعودی عرب میں شدید بارشوں اور سیلاب کے بعد ریاض اور مشرقی صوبے میں ہفتے کے آخر میں سرد ہوائوں اور گرج چمک کے ساتھ بارشوں کے نئے سلسلے کی پیشنگوئی کی گئی ہے۔سعودی موسمیاتی ادارے پریذیڈینسی آف میٹرولوجی اینڈ انوارنمنٹ (پی ایم ای ) کے ترجمان حسین القاہانی نے بتایا کہ موسمی حالات میں تبدیلی گزشتہ ہفتے کی نسبت اس بار قدرے کم ہے جبکہ دارالحکومت میں گرد ہوائیں چلنے کا بھی امکان ہے۔

محکمہ موسمیات کے مطابق جمعہ کے روز دن کے اوقات میں درجہ حرارت 18 ڈگری سینٹی گریڈ اور ہفتے کو 19 ڈگری سینٹی گریڈ کا امکان ہے جبکہ ہفتے کے آخر میں رات کے اوقات میں درجہ حرارت کم ہو کر 9 ڈگری سینٹی گریڈ ہوگا ۔مشرقی صوبے میں دن کے اوقات میں درجہ حرارت 21 اور 22 ڈگری سینٹی گریڈ اور رات میں9 ڈگری سینٹی گریڈ ہو گا ۔

(جاری ہے)

ضلع عسیر میں جمعہ کو دن کے وقت 25 ڈگری سینٹی گریڈ اور ہفتے کو درجہ حرارت کم ہو کر 22 ڈگری سینٹی گریڈ ہونے کا امکان ہے جبکہ ہفتے کے آخر میں رات میں 12 ڈگری سینٹی گریڈ ہو گا۔

القاہانی نے متاثرہ علاقوں میں لوگوں کو احتیاطی تدابیر اپنانے اور ضروری اقدامات پر زور دیتے ہوئے کہا ہے کہ ٹریفک ڈیپارٹمنٹ، سول ڈیفینس، وزارت صحت اور کوسٹ گارڈ کی طرف سے دی گئی ہدایات پر عمل کریں۔ موسم میں تبدیلی کی لہر ہفتے تک جاری رہنے کا امکان ہے ۔