اسلام آباد (اُردو پوائنٹ اخبارتازہ ترین - این این آئی۔ 22 فروری2017ء) ڈپٹی کمیشنر اسلام آباد کیپٹن ریٹائرڈ مشتاق احمدنے اپنی ٹیم کے ہمراہ اسلام آباد چیمبر آف کامرس اینڈ انڈسٹری کا دورہ کیا اور اس موقع پر خطاب کرتے ہوئے کہا کہ تاجر برادری معیشت کی ترقی میں ریڈھ کی ہڈی کا درجہ رکھتی ہے لہٰذا مقامی انتظامیہ ان کے مسائل کو ترجیحی بنیادوںپر حل کرنے کی کوشش کرے گی۔
اسسٹنٹ ڈپٹی کمیشنر ایسٹ کیپٹن ریٹائرڈ وقاص رشید، اسسٹنٹ کمیشنر سیکرٹیریٹ حسن وقار چیمہ، اسسٹنٹ کمیشنر صدر محترمہ بشرا اقبال اور دیگر بھی ان کے ہمراہ تھے۔ڈپٹی کمیشنر نے کہا کہ قانون
کرایہ داری کے مسودے پر مطلوبہ کارروائی کر کے ایک ہفتے کے اندر اندر واپس قومی اسمبلی کو بھجوا دیا جائے گا۔
(جاری ہے)
انہوں نے کہا کہ سی ڈی اے کے ساتھ آئندہ اجلاس میں مارکیٹوں میں پارکنگ کے مسئلے کو حل کرنے کے بارے میں بات چیت کی جائے گی۔
انہوںنے کہا کہ ہوٹلوں پر چھاپے مارنے کا سلسلہ بند کر دیا گیا ہے اور اس سلسلے میں ہوٹل و فوڈ بزنس کرنے والوں کیلئے ایک نئی گریڈنگ پالیسی بنائی جارہی ہے جس کے بارے میں چیمبر میں ایک سمینار بھی منعقد کیا جائے گا۔ انہوں نے کہا کہ نئی پالیسی کے تحت ہوٹلوں کی درجہ بندی کی جائے گی جبکہ پالیسی منظور ہونے کے بعد چیمبر اور مقامی انتظامیہ کی مشترکہ ٹیمیں ہوٹلوں اور فوڈ آئوٹ لیٹس کا معائنہ کریں گی۔
انہوں نے کہا کہ مارکیٹ کمیٹی کو اب تاجر برادری کے منتخب نمائندے چلائیں گے اوراس سلسلے میں ان کے تحفظات کو دور کرنے کی کوشش کی جائے گی۔ انہوںنے کہا کہ اسلام آبادمیں جلسے کرنے کیلئے پریڈ گرائونڈ کو مختص کر دیا گیا ہے اور آئندہ جلسے اسی جگہ منعقد ہوں گے۔ انہوں نے بعض اجاگر کردہ مسائل کو حل کرنے کیلئے موقع پر ہی احکامات جاری کئے۔
اس موقع پر اپنے خطاب میں اسلام آباد چیمبر آف کامرس اینڈ انڈسٹری کے صدر خالد اقبال ملک نے کہا کہ قومی اسمبلی کی ایک قائمہ کمیٹی نے اسلام آباد کیلئے ایک نئے قانون
کرایہ داری کا مسودہ مقامی انتظامیہ کے پاس بھیج رکھا ہے جس پر انتظامیہ عوام کی رائے لینا چاہتی ہے ۔ انہوں نے مطالبہ کیا کہ یہ عمل جلد مکمل کیا جائے کیونکہ قانون
کرایہ داری کی عدم موجودگی میں تاجر برادری کو مسائل کا سامنا ہے ۔
انہوں نے مزید کہا کہ چیمبر کی مشاورت سے مذکورہ مسودہ پر عوامی رائے لینے کا عمل تیزی سے مکمل کیا جائے تا کہ جلد اسلام آباد میں قانون
کرایہ داری کا نفاذ ممکن ہو سکے۔انہوں نے کہا کہ ہو سیل منڈی کیلئے ایک مارکیٹ کمیٹی تشکیل دی گئی ہے تاہم اس کی کارکردگی کو بہتر بنانے کیلئے مقامی انتظامیہ منڈی کی یونین کے ساتھ بات چیت کے ذریعے معاملات طے کرے۔
انہوںنے کہا کہ اسلام آباد کی مارکیٹوں میں پارکنگ کا مسئلہ سنگین ہوتا جا رہا ہے لہذا مقامی انتظامیہ اس مسئلے کو حل کرنے کیلئے سی ڈی اے کے ساتھ مل کر کوئی جامع حکمت عملی وضع کرے۔ انہوں نے کہا کہ مارکیٹوں اور شاہراہوں پر جلسے جلوسوں کی وجہ سے کاروباری سرگرمیاں بہت متاثر ہوتی ہیں لہذا انہوں نے اس بات پر زور دیا کہ مقامی انتظامیہ ایسی سرگرمیوں کیلئے شہر سے باہر کوئی جگہ مختص کرے تا کہ کاروبار کا حرج نہ ہو۔
اسلام آباد چیمبر آف کامرس اینڈ انڈسٹری کے سینئر نائب صدر خالد ملک، نائب صدر طاہر ایوب، سابق صدر ظفربختاوری، اجمل بلوچ، خالد چوہدری، طاہر عباسی اور سردار طاہر سمیت مختلف مارکیٹوں کے نمائندگان نے اپنے اپنے مسائل سے ڈپٹی کمیشنر کو آگاہ کیا اور ان کو حل کرنے کا مطالبہ کیا۔
