کیلیفورنیا میں شدید طوفان کے باعث 4افراد ہلاک، معمولات زندگی درہم برہم ،300سے زائد پروازیں منسوخ

کیلیفورنیا(اُردو پوائنٹ اخبارتازہ ترین - آئی این پی۔ 18 فروری2017ء) امریکہ کی ریاست کیلیفورنیا کے وسطی اور جنوبی علاقوں میں طاقتور طوفان کے باعث 4 افراد ہلاک جب کہ نظام زندگی درہم برہم جبکہ 300سے زائد پروازیں منسوخ ہوگئیں،طوفان کے باعث بعض علاقوں میں مٹی کے تودے گرنے کے خدشے کے باعث لوگوں کو محفوظ مقامات کی طرف منتقل کرنے کی ہدایت کردی گئی ۔

غیر ملکی میڈیا کے مطابق کیلیفورنیا کے وسطی اور جنوبی علاقوں میں طاقتور طوفان کے باعث4 افراد ہلاک جب کہ نظام زندگی درہم برہم ہوگیا۔بحرالکاہل سے اٹھنے والے اس طوفان کے باعث بعض علاقوں میں لوگوں کو اس بنا پر محفوظ مقامات کی طرف منتقل ہونے کا بھی کہا گیا ہے کہ یہاں مٹی کے تودے گرنے کا خدشہ ہے۔لاس اینجلس کے بین الاقوامی ہوائی اڈے پر آنے اور جانے والی 300سے زائد پروازیں موخر یا منسوخ کی جا چکی ہیں۔

(جاری ہے)

لاس اینجلس کے علاقے شرمین اوکس میں طوفان کے باعث ایک درخت بجلی کی تاروں پر جا گرا جس سے یہ تاریں وہاں سے گزرنے والی ایک گاڑی پر گریں اور ایک 55 سالہ شخص ہلاک ہو گیا۔طوفان کے باعث ان علاقوں میں تقریبا 70 میل فی گھنٹہ کی رفتار سے ہوائیں چل رہی ہیں جب کہ شدید بارشوں کے باعث ندی نالوں میں طغیانی بھی دیکھی جا رہی ہے۔سان برنارڈینو کانٹی میں ہنگامی امداد کے محکمے کے ایک عہدیدار کے مطابق وکٹر ویل کے علاقے میں طغیانی کے باعث متعدد گاڑیاں پانی میں بہہ گئیں۔ہیلی کاپٹر کی مدد سے یہاں ایک گاڑی کی چھت پر کھڑے شخص کو تو بچا لیا گیا لیکن ایک اور شخص موت کا شکار ہو چکا تھا۔قومی موسمیاتی محکمے کے مطابق یہ 1995 کے بعد اس علاقے میں آنے والا شدید ترین طوفان ہوسکتا ہے۔