دہشت گردکسی بھی طرح معافی کے قابل نہیں،یونائٹیڈ بزنس گروپ

کراچی ۔ (اُردو پوائنٹ اخبارتازہ ترین - اے پی پی۔ 17 فروری2017ء) بزنس کمیونٹی کے نمائندوں نے ملک سے دہشت گردی کی نئی لہر کو ختم کرنے کیلئے سخت ترین اقدامات کرنے کا مطالبہ کر دیا۔ یونائٹیڈ بزنس گروپ (یو بی جی) کے سرپرست اعلیٰ ایس ایم منیر، سندھ ریجن کے چیئرمین خالد تواب، سینیٹر عبدالحسیب خان، مرکزی ترجمان گلزار فیروز، حنیف گوہر، ڈاکٹر مرزا اختیار بیگ، عبدالسمیع خان، ممتاز شیخ، ملک خدا بخش، نور احمد خان، اکرام راجپوت، رضوانہ شاہد، فرزانہ خان نے اپنے مشترکہ بیان میں حضرت لعل شہباز قلندرؒکے مزارپر ہونے والے دھماکے کی شدید مذمت کرتے ہوئے کہا کہ لاہور، غلنئی اور شبقدر میں خود کش دھماکوں کے بعد حضرت لعل شہباز قلندرؒکے مزارپر ہونے والا دھماکے میں 76 سے زائد شہادتیں اس بات کی متقاضی ہیں کہ دہشت گردکسی بھی طرح معافی کے قابل نہیں، پاکستان میں ہونے والے حالیہ خودکش بم دھماکے دراصل پاکستانی معیشت کو نقصان پہنچانے کی سازش ہے اور پاکستان دشمن قوتیں سی پیک کے ذریعہ مستقبل میں پاکستان کو پہنچنے والے فوائد سے خوفزدہ ہیں۔

(جاری ہے)

انہوں نے کہا کہ بزنس کمیونٹی وزیراعظم نواز شریف اور ان کی حکومت اور پاکستان آرمی کے ساتھ قدم بہ قدم موجود ہے، ملک سے دہشت گردی جڑسے اکھاڑ پھینکنے کیلئے آپریشن ضرب عضب کو جاری رکھا جائے، پاکستان کے تاجر اور صنعتکار دشمنوں کی کسی سازش کوکامیاب ہونے اور ملک کو نقصان پہنچانے نہیں دیں گے۔ یو بی جی رہنمائوں نے کہا کہ دہشتگردی کے واقعات میں پاکستان دشمن قوتیں ملوث ہیں، عبادتگاہوں، مزارات اور بازاروں میں معصوم پاکستانیوں کا خون بہانے والے سفاک درندے ہیں مگر ان درندوں کی بزدلانہ کاروائیوں سے قوم کے ارادے کمزور نہیں ہوں گے۔

انہوں نے حضرت لعل شہباز قلندرؒ میں شہید افراد کے اہل خانہ سے تعزیت کی اور کہا کہ بزنس کمیونٹی ان کے غم میں برابر کے شریک ہے اور زخمیوں کی جلد صحت یابی کیلئے دعا گو ہیں۔