آرمی چیف کے زیر صدارت اجلاس میں کالعدم تنظیموں کے خلاف آپریشن تیز اور کومبنگ آپریشن کے جنوبی پنجاب سے آغاز کا فیصلہ

آپریشن سے قبل پنجاب حکومت کو اعتماد میں لیا جائیگا ، آپریشن میں فوج حساس اداروں کی مکمل معاونت کریگی ،جنرل قمر جاوید باجوہ کور کمانڈر لیفٹیننٹ جنرل صادق علی کی اجلاس کو سانحہ لاہور پر بریفنگ آرمی چیف کی کیپٹن (ر) احمد مبین کی رہائشگاہ پر جاکر اہلخانہ سے تعزیت ،سول سروسز ہسپتال کا بھی دورہ ، زخمیوں کی عیادت

منگل 14 فروری 2017 21:31

آرمی چیف کے زیر صدارت اجلاس میں کالعدم تنظیموں کے خلاف آپریشن تیز ..

لاہور (اُردو پوائنٹ اخبارتازہ ترین - آئی این پی۔ 14 فروری2017ء) آرمی چیف جنرل قمر جاوید باجوہ کے زیر صدارت اجلاس میں کالعدم تنظیموں کے خلاف آپریشن تیز اور جنوبی پنجاب میں کومبنگ آپریشن شروع کرنے کا فیصلہ کیا گیا جبکہآرمی چیف نے کہاکہ آپریشن سے قبل پنجاب حکومت کو اعتماد میں لیا جائے گا ۔ منگل کو یہاں کور ہیڈ کوارٹرز میں آرمی چیف جنرل قمر جاوید باجوہ کی سربراہی میں اعلیٰ سطح کا اجلاس ہواجس میں کور کمانڈر لاہور ، ڈی جی رینجرز پنجاب اور حساس اداروں کے سربراہوں اور جی او سی 10 ڈویژن نے بھی شرکت کی ۔

اجلاس کے شرکاء کو کور کمانڈر لیفٹیننٹ جنرل صادق علی نے سانحہ لاہور پر بریفنگ دی ۔ اجلاس میں کالعدم تنظیموں کے خلاف آپریشن تیز کرنے کا فیصلہ کیا گیا ۔

(جاری ہے)

یہ بھی فیصلہ کیاگیا کہ کومبنگ آپریشن کا آغاز جنوبی پنجاب سے کیا جائے گا ۔ نام بدل کر کام کرنے والی کالعدم تنظیموں کے خلاف بھی آپریشن کیا جائے گا۔ آرمی چیف نے کہاکہ آپریشن سے پہلے پنجاب حکومت کو اعتماد میں لیا جائے گا ۔

آپریشن میں آرمی حساس اداروں کی مکمل معاونت کرے گی ۔ دریں اثناء آرمی چیف جنرل قمر جاوید باجوہ نے کیپٹن (ر) احمد مبین کی رہائشگاہ کا دورہ بھی کیا اور احمد مبین کی شہادت پر اہلخانہ سے تعزیت کی جبکہ وہ سول سروسز ہسپتال بھی گئے اور وہاں انہوں نے زخمیوں کی عیادت کی اور یقین دلایا کہ واقعے میں ملوث دہشتگردوں کوکیفر کردارتک پہنچایا جائے گا …(م د )