گلگت بلتستان میں شدید برفباری سے نظام زندگی مفلوج، خوراک کی قلت کا سامنا

گلگت / اسکردو(اُردو پوائنٹ اخبارتازہ ترین - آئی این پی۔ 08 فروری2017ء) گلگت بلتستان میں شدید برفباری اور برفانی تودہ گرنے کے باعث نظام زندگی درہم برہم ہوگیا جب کہ علاقے میں خوراک کی قلت پیدا ہوگئی ۔ اسکردو،استور،شگر،غذر سمیت گلگت بلتستان کے بالائی علاقوں میں شدید برفباری کا سلسلہ جاری ، لوگ گھروں میں محصور ہوگئے جب کہ خوراک اور ادویات کی قلت پیدا ہو گئی ۔

(جاری ہے)

شگر کے بالائی علاقوں برزل ٹاپ، قمری، منی مرگ، کلشی، کالا پانی، میر ملک اور چلم میں 8 سے 10 فٹ تک برف پڑ گئی جس کے باعث 20 ہزار سے زائد افراد کئی روز سے گھروں میں محصور ہوگئے ۔ استور میں بھی شدید برف باری کی وجہ سے عیدگاہ اور گوریکوٹ کی رابطہ سڑک بند اور بولن کے مقام پر برفانی تودہ گرنے سے بلاک ہوگئی ۔ چلم، گدیے اور ترشینگ کی رابطہ سڑکیں بھی ایک ہفتہ سے مکمل بند ، شگر کے ارندو گاؤں میں گلیشئیرسرکنے لگا جس کے باعث گاؤں کو خالی کرالیا گیا ۔