قومی اسمبلی میں کھیلوں کے وفاقی وزیر پاکستان کے قومی کھیل سے لاعلم نکلے

رکن قومی اسمبلی کے سوال کے جواب میں کبڈی کو بھی قومی کھیل قرار دیدیا، پی پی پی کے رکن اسمبلی کا کبڈی کے علاقائی کھیل کو قومی کھیل قرار دینے پر احتجاج

منگل 7 فروری 2017 14:05

قومی اسمبلی میں کھیلوں کے وفاقی وزیر پاکستان کے قومی کھیل سے لاعلم ..

اسلام آباد (اُردو پوائنٹ اخبارتازہ ترین - آئی این پی۔ 07 فروری2017ء) قومی اسمبلی میں کھیلوں کے وفاقی وزیر ریاض پیرزادہ کی پاکستان کے قومی کھیل سے لاعلمی سامنے آگئی، رکن قومی اسمبلی کے سوال کے جواب میں کبڈی کو بھی قومی کھیل قرار دیدیا، پی پی پی کے رکن اسمبلی عبدالستار بچانی کا کبڈی کے علاقائی کھیل کو قومی کھیل قرار دینے پر احتجاج، سپیکر سردار ایاز صادق نے یہ کہہ کر وفاقی وزیر کو بچا لیا کہ وزیر صاحب نے ہاکی کو بھی قومی کھیل قرار دیا ہے ۔

گزشتہ روز ایوان میں وقفہ سوالات کے دوران اس وقت دلچسپ صورتحال پیدا ہو گئی جب وفاقی وزیر برائے بین الصوبائی رابطہ و کھیل ریاض پیر زادہ نے پی ٹی آئی کے رکن ساجد احمد کے سوال کے جواب میں کبڈی کو بھی قومی کھیل قرار دیدیا ۔

(جاری ہے)

ساجد احمد نے پوچھا تھاکہ پاکستان کا قومی کھیل کون سا ہے ، ریاض پیرزادہ نے سوال کا براہ راست جواب دینے کی بچائے آئیں بائیں شائیں شروع کر دی اور کہا کہ کبڈی ہمارا قومی کھیل ہے اور ہاکی بھی قومی کھیل ہے جس پر پیپلز پارٹی عبدالستار بچانی نے کہا کہ وزیر کھیل کو یہ نہیں پتہ کہ کبڈی قومی کھیل نہیں ایک علاقائی کھیل ہے اس طرح تو سندھ میں ’’ملاکھڑا‘‘ اور بلوچستان میں فٹبال بہت مقبول کھیل ہیں ۔

سپیکر سردار ایاز صادق نے یہ کہہ کر ریاض پیرزادہ کو مشکل صورتحال سے نکال لیا کہ وفاقی وزیر نے ہاکی کا بھی نام لیا ہے کہ یہ ہمارا قومی کھیل ہے ۔ بعد ازاں ریاض پیرزادہ نے عبدالستار بچانی کے سوال کے جواب میں طنز کیا کہ معزز رکن تو صرف گلی ڈنڈا اچھا کھیل لیتے ہیں ۔