عید پر فلم کی ریلیز سلمان خان کے حصہ ہونے سے مشروط

اگر میں سلمان خان کے ساتھ کوئی فلم پروڈیوس کروں گا تو اسے ضرور عید پر ریلیز کروں گا‘کرن جوہر

اتوار 5 فروری 2017 11:50

ممبئی (اُردو پوائنٹ اخبارتازہ ترین - این این آئی۔ 05 فروری2017ء) ویسے تو بولی وڈ پروڈیوسرز کی مرضی ہے کہ وہ اپنی فلم کس تاریخ کو ریلیز کریں، لیکن عید کے موقع پر اپنی کسی بھی فلم کو ریلیز کرنے سے کرن جوہر بیحد ڈرتے ہیں، جس کی وجہ کوئی اور نہیں دبنگ اداکار سلمان خان ہیں۔ کرن جوہر کا اپنی آنے والی فلم ’’بدری ناتھ کی دلہنیا‘‘ کی ٹریلر ریلیز کے موقع پر کہنا تھا کہ وہ اپنی فلم کو عید کے موقع پر ریلیز نہیں کرنا چاہتے کیوں کہ یہ موقع صرف اور صرف سلمان خان کا ہے۔

کرن جوہر سے جب اپنی فلم عید پر ریلیز کرنے کے حوالے سے سوال کیا گیا تو انہوں نے کہا کہ نہیں، عید کا موقع صرف سلمان خان کا ہے، ظاہر ہے اگر میں سلمان خان کے ساتھ کوئی فلم پروڈیوس کروں گا تو اسے ضرور عید پر ریلیز کروں گا، ورنہ نہیں، ہم لوگ صرف مووی ریلیز نہیں کرتے بلکہ یہ بھی چاہتے ہیں کہ اسے بہت لوگ دیکھنے جائیں۔

(جاری ہے)

کرن جوہر نے مزید کہا کہ ایک پروڈیوسر ہونے کے باعث کسی بھی فلم کی ریلیز سے قبل بہت سے پہلوؤں پر غور کیا جاتا ہے جن میں دوسری فلموں کی ریلیز کی تاریخ بھی شامل ہے۔

سلمان خان کی گزشتہ سال عید پر ریلیز ہونے والی فلم ’’سلطان‘‘ نے کئی ریکارڈز توڑے، اس سے قبل عید پر ریلیز فلم ’’بجرنگی بھائی جان‘‘ بھی اٴْس سال کی کامیاب فلم کے طور پر سامنے آئی تھی۔واضح رہے کہ کرن جوہر اور سلمان خان مشترکہ پروڈکشن کے ساتھ ایک فلم بنانے جارہے ہیں، جس میں مرکزی کردار اکشے کمار کرتے نظر آئیں گے۔