پنجاب بھر کی جیلوں میں’’ تعلیم بالغاں‘‘ پروگرام شروع کرنے کا فیصلہ

لاہور۔2 فروری(اُردو پوائنٹ اخبارتازہ ترین - اے پی پی۔ 02 فروری2017ء) پنجاب بھر کی تمام جیلوں میں ان پڑھ قیدیوں کو بنیادی تعلیم فراہم کرنے کیلئے منصوبہ تیار کر لیا گیاہے، جیلوں کو جرائم کی نرسریاں بننے کی بجائے درس گاہوں میں تبدیل کریں گے، قیدی خواتین و حضرات کو جیل کے اندر تعلیم یافتہ قیدی بنیادی تعلیم دیں گے، علم کی روشنی سے قیدیوں کو معاشرے کا تعمیری اور کارآمد رکن بنایا جائے گا،4 ماہ کے تعلیم بالغاں کورس سے قیدیوں کو لکھنے پڑھنے کے قابل بنایا جائے گا،قیدیوں کو کتابیں، سٹیشنری اور تمام ضروری سامان فراہم کرے گا۔

ان خیالات کا اظہار صوبائی وزیر لٹریسی و نان فارمل بیسک ایجوکیشن ڈاکٹر فرخ جاوید نے پنجاب بھر کی جیلوں میں ان پڑھ قیدیوں کیلئے تعلیم کی فراہمی کے منصوبے کے حوالے سے اجلاس کی صدارت کرتے ہوئے کیا۔

(جاری ہے)

اس موقع پر سیکرٹری لٹریسی ڈاکٹر نوید احمدچوہدری، ایڈیشنل سیکرٹری اکرم جان ، پراجیکٹ ڈائریکٹر شکیل احمد سمیت متعلقہ افسران بھی موجود تھے، اجلاس میں بتایا گیا کہ محکمہ لٹریسی ماضی میں جیلوں میں قیدیوں کو تعلیم کے زیور سے آراستہ کرنے کے پائلٹ منصوبے پر خوش اسلوبی سے کام مکمل کر چکا ہے،پنجاب میں لاہور، ساہیوال، ملتان، راولپنڈی،بہاولپور، میانوالی اور ڈی جی خان سمیت بڑی جیلوں کا ڈیٹا حاصل کیا جا چکا ہے اور باقی پر کام جاری ہے،صوبائی وزیر لٹریسی ڈاکٹر فرخ جاویدنے اس موقع پرسیکرٹری لٹریسی ڈاکٹر نوید چوہدری اور آئی جی جیل خان جات فاروق نذیر کو ہدایت کی کہ منصوبے کو عملی جامہ پہنانے کیلئے جلد لائحہ عمل تشکیل دیں،یاد رہے کہ اس وقت پاکستان میں شرح خواندگی 60جبکہ پنجاب میں 63فیصد ہے جس میں بہتری کیلئے محکمہ مختلف پراجیکٹس پر کام کر رہا ہے، اب تک صوبہ بھر میںNFBES اور NFEFS کی13,274 سنٹرز بنائے گئے ہیں جہاں 4,35,804 سکولز سے باہر بچوں کو پرائمری تعلیم مہیا کی جا رہی ہے، پنجاب بھر میں6,860 ALC اورNFEAC سینٹرز بنائے گئے ہیں جن میں 1,33,844 نوجوان اور بزرگ تعلیم و فنی تربیت حاصل کر رہے ہیں ، ایک لاکھ سے زائد ان پڑھ افراد کو بنیادی تعلیم دی گئی اور مختلف ہنر سکھائے جا رہے ہیں، جدیدانفارمیشن ٹیکنالوجی سے لیس مانیٹرنک اسیسمنٹ سسٹم رائج کیا گیاہے اور تمام سکولوں کی مستقل اسیسمنٹ کی جا رہی ہے، صوبائی وزیر لٹریسی ڈاکٹر فرخ جاوید کی ہدایت پرپنجاب بھر کی جیلوں میں قیدیوں کو بنیادی تعلیم فراہم کرنے کیلئے پروگرام مرتب کر لیا گیا ہے جس کے تحت لاکھوں قیدیوں کو تعلیم کے زیور سے آراستہ کیا جائے گا۔