وزارت داخلہ نے ایان علی کا نام ای سی ایل سے نکالنے کے سندھ ہائی کورٹ کے فیصلے کو سپریم کورٹ میں چیلنج کردیا

ہفتہ 28 جنوری 2017 21:20

اسلام آبا(اُردو پوائنٹ اخبارتازہ ترین - آن لائن۔ 28 جنوری2017ء) وزارت داخلہ نے ماڈل ایان علی کا نام ای سی ایل سے نکالنے سے متعلق سندھ ہائی کورٹ کے فیصلے کو سپریم کورٹ میں چیلنج کردیا۔درخواست میں سپریم کورٹ سے استدعا کی گئی کہ سندھ ہائی کورٹ کے فیصلے کو کالعدم قرار دیتے ہوئے ماڈل ایان علی کا نام ای سی ایل میں رہنے دیا جائے۔تفصیلات کے مطابق وفاقی وزارت داخلہ نے ماڈل ایان علی کا نام ایگزٹ کنٹرول لسٹ (ای سی ایل) سے نکالنے سے متعلق سندھ ہائی کورٹ کے حکم کے خلاف سپریم کورٹ میں اپیل دائر کردی ہے۔

درخواست میں موقف اختیار کیا کہ ایان علی کا نام محکمہ داخلہ پنجاب کی درخواست پر ای سی ایل میں شامل کیا گیا تھا۔ اس لئے اس سلسلے میں اس قسم کی کسی بھی درخواست کی سماعت سندھ ہائی کورٹ کے دائرہ اختیار میں نہیں تھی،اس کے علاوہ کیس کی سماعت کے دوران پنجاب حکومت کا موقف بھی نہیں سنا گیا۔

(جاری ہے)

درخواست میں مزید موقف اختیار کیا کہ سندھ ہائی کورٹ نے میرٹ پر فیصلہ دیا لیکن درخواستوں کے قابل سماعت ہونے کا جائزہ نہیں لیا، سندھ ہائی کورٹ کے جج جسٹس کے کے آغاز دو مرتبہ ایان علی کیس سن چکے تھے جس کے باعث انہیں تیسری مرتبہ کیس نہیں سننا چاہیے تھا۔

واضح رہے کہ ایان علی کو 2015 میں راولپنڈی ایئرپورٹ سے کروڑوں ڈالر مالیت کی غیر ملکی کرنسی اسمگل کرنے کے الزام میں گرفتار کی گئی تھیں اور ان پر غیر ملکی کرنسی اسمگلنگ اور کسٹم آفیسر کے قتل کا مقدمہ درج ہے۔ ۔(حسن رضا)