صومالیہ : ہوٹل پر دو خود کش حملے اور فائرنگ، 13 افراد ہلاک

بارودی مواد سے بھری ایک گاڑی ہوٹل کے اندر گھس گئی اور پھر وہاں فائرنگ شروع ہو گئی، عینی شاہدین

بدھ 25 جنوری 2017 21:16

موغا دیشو (اُردو پوائنٹ اخبارتازہ ترین - آن لائن۔ 25 جنوری2017ء) صومالیہ کے دارالحکومت موغادیشو میں پولیس نے دایاہ نامی ہوٹل پر خودکش حملے اور فائرنگ کے نتیجے میں اب تک 13 افراد کی ہلاکت کی تصدیق کی ہے۔پولیس کے مطابق اس ہوٹل میں کئی اراکینِ پارلیمان بھی قیام پذیر تھے اور شدت پسند گروپ الشباب نے حملے کے ذمہ داری قبول کر لی ہے۔ غیر ملکی خبررسا ں ادارے کے مطابق پولیس اہلکار میجر محمد احمد کا بیان جاری کیا ہے جس میں وہ کہتے ہیں کہ: 'دو خودکش حملوں کے باعث سکیورٹی اہلکاروں اور شہریوں سمیت اب تک 13 افراد ہلاک ہو چکے ہیں جبکہ 12 افراد زخمی ہیں۔

'عینی شاہدین نے کہا کہ بارودی مواد سے بھری ایک گاڑی ہوٹل کے اندر گھس گئی اور پھر وہاں فائرنگ شروع ہو گئی۔پولیس کے افسر کرنل عبدی قادر حسین نے روئٹرز کو بتایا کہ سکیورٹی اہلکاروں نے ہوٹل کی عمارت کو محفوظ کر لیا ہے۔

(جاری ہے)

انھوں نے کہا: 'ہم نے ہوٹل میں موجود لوگوں کو بچا لیا ہے اور ریسکیو آپریشن ختم ہو گیا ہے۔ ہمارے اہلکار ہوٹل میں موجود ہیں اور ہم مرنے والوں کی تعداد کے بارے میں کچھ دیر میں بتایئں گے۔'دایاہ ہوٹل موغادیشو میں صدارتی محل سے ایک میل کے فاصلے پر واقع ہے اور ارکانِ پارلیمان اور اہم مہمان اسی ہوٹل میں قیام کرتے ہیں۔واضح رہے کہ صومالیہ میں اس وقت الیکشن کی تیاریاں جاری ہیں۔۔