چولستان ڈیزرٹ ریلی فروری میں صحرائے چولستان میں منعقد ہو گی‘ صوبائی وزیر کو آپریٹو

لاہور(اُردو پوائنٹ اخبارتازہ ترین - این این آئی۔ 01 جنوری2017ء)صوبائی وزیر کو آپریٹو چئیرمین چولستان ڈویلپمنٹ تھارٹی ملک محمد اقباک چنڑ نے کہا ہے کہ ٹی ڈی سی پی چولستان ڈیزرٹ ریلی 9سے 12فروری تک بہاول پور ڈویژن کے صحرائے چولستان میں منعقد ہو گی ،اس سلسلہ میں روٹ کا جائزہ لینے کے لئے ایک کمیٹی تشکیل دے دی گئی ہے، ٹی ڈی سی پی چولستان ڈیزرٹ ریلی کے تمام تر انتظامات شاندار انداز وقت مقررہ سے پہلے مکمل کر لئے جائیں۔

اپنے ایک بیان میں انہوں نے کہا کہ ڈیزرٹ ریلی بہاول پور، بہاول نگر اور رحیم یار خاں اضلاع کے چولستان میں ہو گی جس کا روٹ تقریباً500کلومیٹر پر مشتمل ہو گا۔ انہوں نے کہا کہ تینوں اضلاع کے ڈسٹرکٹ کوآرڈینیشن آفیسرز ڈیزرٹ ریلی کے روٹس اور چیک پوسٹ کے قیام کے لئے شاندار انتظامات کریں گے ۔

(جاری ہے)

انہوں نے کہا کہ ٹی ڈی سی پی چولستان ڈیزرٹ ریلی ڈویژن کے تینوں اضلاع میں منعقد کرائی جائے گی تاکہ ان اضلاع کے سیاح میگا ایونٹ سے لطف اندوز ہو سکیں۔

انہوں نے کہا کہ ڈیزرٹ ریلی کے موقع پر مختلف سپورٹس اینڈ کلچرل سرگرمیاں ترتیب دی جائیں گی۔انہوں نے مزید کہا کہ تینوں اضلاع میں واقع قلعہ جات، ڈیراور، خیر گڑھ، بجنوٹ، نواں کوٹ، دین گڑھ، موج گڑھ، مروٹ، جام گڑھ اور مہر گڑھ کو خوبصورت لائٹنگ سے سجایا جائیگا۔