نوازشریف نے آمروں سے زیادہ اداروں کو نقصان پہنچایا ، پانامہ پر تمام ثبوت سپریم کورٹ میں جمع کرا دیئے ہیں ، بلاول بھٹو نے اچھی اپوزیشن کا کردار ادا کرنے کی کوشش کی، دیکھیں گے پی پی والے پانامہ پر کس طرح وزیراعظم کو جواب دہ بناتے ہیں،آئندہ انتخابات میں(ن) لیگ کو دھاندلی کا ہتھیار استعمال نہیں کرنے دیں گے

تحریک انصاف کے چیئرمین عمران خان کی صحافیوں سے غیر رسمی گفتگو

بدھ 28 دسمبر 2016 21:23

اسلام آباد(اُردو پوائنٹ اخبارتازہ ترین - آئی این پی۔ 28 دسمبر2016ء) پاکستان تحریک انصاف کے چیئرمین عمران خان نے کہا ہے کہ نوازشریف نے آمروں سے زیادہ اداروں کو نقصان پہنچایا ، پانامہ پر تمام ثبوت سپریم کورٹ میں جمع کرا دیئے ہیں ، بلاول بھٹو نے اچھی اپوزیشن کا کردار ادا کرنے کی کوشش کی،پیپلزپارٹی کے فیصلے پر فی الحال کوئی تبصرہ نہیں کروں گا، دیکھیں گے پی پی والے پانامہ پر کس طرح وزیراعظم کو جواب دہ بناتے ہیں ، آئندہ انتخابات میں(ن) لیگ کو دھاندلی کا ہتھیار استعمال نہیں کرنے دیں گے۔

بدھ کو عمران خان نے صحافیوں سے غیر رسمی گفتگو میں کہا کہ دیکھتے ہیں پیپلزپارٹی کونسی پالیسی اختیار کر کے پانامہ پر وزیراعظم کو جوابدہ بناتی ہے ، بلاول نے اچھی اپوزیشن کرنے کی کوشش کی ہے۔

(جاری ہے)

انہوں نے کہا کہ عدالت نے پورا کیس سن لیا تھا پھر کمیشن بنانے کی کیا ضرورت تھی ، پانامہ پر تمام ثبوت سپریم کورٹ میں جمع کرادیے ، نوازشریف نے اداروں کو آمروں سے زیادہ نقصان پہنچایا ہے ، وزیراعظم چاہتے تھے پانامہ ایشو قوم کی آنکھوں سے اوجھل رہے ، پانامہ کیس کا فیصلہ چند دن کی سماعت کا محتاج ہے۔

چیئرمین پی ٹی آئی نے کہا کہ پانامہ پر قوم کے جائز سوالات پر وزیراعظم مسلسل جھوٹ بولتے رہے۔ تحریک انصاف نہ ہوتی تو آئندہ نسلیں بھی ان کے بچوں کی غلامی کرتیں ، عام آدمی کو درپیش ہر مسئلے کے پیچھے کرپشن جیسی لعنت کا رفرما ہے۔ عمران خان نے کہا کہ خیبرپختونخوا میں نظام کی تبدیلی کی بنیاد رکھ دی ہے ، آئندہ انتخابات میں(ن) لیگ کو دھاندلی کا ہتھیار استعمال نہیں کرنے دیں گے۔انہوں نے کہا کہ پیپلزپارٹی کے فیصلے پر فی الحال کوئی تبصرہ نہیں کروں گا۔