عمران خان کا تیسری مرتبہ منتخب وزیراعظم کے ساتھ مقابلہ مضحکہ خیز ہے، وزیراعظم صرف لوگوں کی خدمت کرکے ہی بنا جاتا ہے، جو شخص آئینی اداروں کی عزت نہیں کرسکتا وہ وزیراعظم بننے کا اہل نہیں، وزیراعظم محمد نواز شریف صرف پاکستان کے ہی نہیں بلکہ اس خطہ کے لیڈر ہیں

وزیرمملکت برائے اطلاعات و نشریات و قومی ورثہ مریم اورنگزیب کا بیان

اتوار 25 دسمبر 2016 22:00

اسلام آباد ۔ (اُردو پوائنٹ اخبارتازہ ترین - اے پی پی۔ 25 دسمبر2016ء) وزیرمملکت برائے اطلاعات و نشریات و قومی ورثہ مریم اورنگزیب نے کہا ہے کہ عمران خان کا تیسری مرتبہ منتخب وزیراعظم کے ساتھ مقابلہ مضحکہ خیز ہے، وزیراعظم صرف لوگوں کی خدمت کرکے بنا جاتا ہے اور وزیراعظم محمد نواز شریف صرف پاکستان کے ہی نہیں بلکہ اس خطہ کے لیڈر ہیں۔

(جاری ہے)

اتوار کو اپنے ایک بیان میں انہوں نے کہا کہ عمران خان اپنے ساتھ وزیراعظم محمد نواز شریف کا مقابلہ کرنا چھوڑ دیں اور خیالی دنیا سے باہر آجائیں، آج اگر نواز شریف کی قیادت میں سی پیک پر عملدرآمد ہو رہا ہے تو وہ اس خطہ کی ترقی ہے، آج اگر وزیراعظم دہشت گردی اور دہشت گردوں کی کمر توڑ رہے ہیں تو وہ صرف اس خطہ کے امن کیلئے، آج اگر پاکستان کے توانائی کے منصوبے لگ رہے ہیں اور لوڈ شیڈنگ میں کمی آرہی تو وہ صرف اس خطہ کے امن کیلئے۔

انہوں نے کہا کہ عمران خان کو چاہئے کہ وہ کے پی کے میں مایوس کن کارکردگی کو بہتر بنانے پر توجہ دیں۔ مریم اورنگزیب نے کہا کہ جو شخص آئینی اداروں کی عزت نہیں کرسکتا وہ وزیراعظم بننے کا اہل نہیں۔