کراچی ،آصف زرداری کے ساتھی انورمجید کے دفاتر کے بعد گھرپر بھی چھاپا، بھاری مقدار میں اسلحہ اور گولیاں برآمد

سیکورٹی پر تعینات 2 گارڈز گرفتار، تفتیش کے لیے نامعلوم مقام پر منتقل

اتوار 25 دسمبر 2016 12:30

کراچی(اُردو پوائنٹ اخبارتازہ ترین - آئی این پی۔ 25 دسمبر2016ء) سیکورٹی اداروں نے کراچی کے علاقے ڈیفنس میںسابق صدر آصف علی زرداری کے ساتھی انور مجید کے گھر پر چھاپا مار کربڑی مقدار میں اسلحہ اور گولیاں برآمد کرنے کا دعویٰ کیا جبکہ2 گارڈز کو گرفتار کرکے رینجرز افسران کی مدعیت میں مقدمات درج کرلئے گئے ۔

(جاری ہے)

اتورا کوسیکورٹی اداروں نے غیرقانونی اسلحہ رکھنے کے مقدمے میں نامزد ملزم انور مجید کے گھر پر چھاپا مارا ، سیکورٹی پر تعینات 2 سیکورٹی گارڈز کو حراست میں لے کر تفتیش کے لیے نامعلوم مقام پر منتقل کردیا گیا ہے۔

اس سے پہلے سابق صدر آصف علی زرداری کی وطن واپسی سے چند گھنٹے پہلے رینجرز نے آئی آئی چندریگر روڈ اور ہاکی اسٹیڈیم کے قریب واقع دفاتر پر چھاپے مارے تھے ، اس دوران اہم دستاویزات اور خفیہ خانوں میں چھپائی گئی 17 کلاشنکوف، 4پستول، 9 بال بم اور مختلف اقسام کی 3225 گولیاں برآمد کرنے کا دعویٰ کیا گیا تھا۔ انور مجید کے دفاتر پر چھاپوں کے بعد انورمجید اورخواجہ سلمان کے خلاف 2 مقدمات درج کر لیے گئے، مقدمات میں غیرقانونی اسلحہ رکھنے اور انسداد دہشت گردی ایکٹ کی دفعات شامل کی گئی ہیں۔