بلدیاتی اداروں کے انتخابات میں خریدو فروخت جمہوری اصولوں کے منافی ہے‘ سیاست کو پیسے کا کھیل بنانے والے جمہوریت اور عوام کے دشمن ہیں،پاناما لیکس کا معاملہ حکمران خاندان کا تعاقب کرتا رہے گا

سنی اتحاد کونسل پاکستان کے چیئرمین صاحبزادہ حامد رضاکی وفو د سے گفتگو

جمعہ 23 دسمبر 2016 22:08

لاہور(اُردو پوائنٹ اخبارتازہ ترین - آئی این پی۔ 23 دسمبر2016ء) سنی اتحاد کونسل پاکستان کے چیئرمین صاحبزادہ حامد رضا نے کہا ہے کہ نا لائق حکمرانوں نے پاکستان کو مسائلستان بنادیا ہے،بلدیاتی اداروں کے انتخابات میں خریدو فروخت جمہوری اصولوں کے منافی ہے،بلدیاتی اداروں کی سربراہی کے لئے اربوں روپے خرچ کرنے والے عوام سے مخلص نہیں ہوسکتے، سیاست کو پیسے کا کھیل بنانے والے جمہوریت اور عوام کے دشمن ہیں،پاناما لیکس کا معاملہ حکمران خاندان کا تعاقب کرتا رہے گا۔

(جاری ہے)

وہ جمعہ کو مختلف وفود سے گفتگو کر رہے تھے۔ صاحبزادہ حامد رضا نے مزید کہا کہ 2017ء پاکستانی سیاست کا فیصلہ کن سال ثابت ہو گا۔ کشکول توڑنے کے دعویداروں نے قرضے حاصل کرنے کے تمام ریکارڈتوڑ دیئے ہیں۔ کرپٹ افراد کو نفرت کی علامت بنانے کی ضرورت ہے۔ صاحبزادہ حامد رضا نے مزید کہا کہ حرام کی کمائی والے کھرب پتیوں نے سیاست کو آلودہ کردیا ہے۔ بلدیاتی اداروں کے سربراہوں کے انتخابات میں پیسے کی سیاست کا بھیانک چہرہ کھل کر سامنے آگیا ہے۔ نوٹوں اور لوٹوں کی سیاست نے ملک تباہ کردیا ہے۔ پاکستان کی ترقی کے لئے سیاست کو عبادت سمجھنے والے سیاستدانوں کی ضرورت ہے۔