نادہندگان سے و اجبات کی 100فیصد وصولی کیلئے بلا امتیاز کارروائی کی ہدایت

فیصل آباد۔20 دسمبر(اُردو پوائنٹ اخبارتازہ ترین - اے پی پی۔ 20 دسمبر2016ء)حکومت نے نادہندگان سے سرکاری واجبات کی 100فیصد وصولی یقینی بنانے کیلئے بلاامتیاز کارروائی کی ہدایت کرتے ہوئے متعلقہ حکام سے کہا ہے کہ وہ اس سلسلہ میں ٹھوس حکمت عملی مرتب کریںاور پرانے و دیرینہ ڈیفالٹرز سے سرکاری بقایا جات ہر حال میں وصول کرنے کیلئے تمام وسائل بروئے کار لائیں، ناقص کارکردگی کے حامل ریونیو افسران کے خلاف سخت کارروائی عمل میںلائی جائے گی اور بعد ازاں کوئی عذر قابل قبول نہ ہو گا۔

(جاری ہے)

فیصل آباد ڈویژنل انتظامیہ کے ذرائع نے بتا یا کہ چیف سیکرٹری پنجاب اور سینئر ممبر بورڈ آف ریونیو پنجاب کی جانب سے تمام ڈویژنل کمشنر ز ، ڈی سی اوز ،ایڈیشنل ڈسٹرکٹ کلکٹرز، اسسٹنٹ کمشنر، محکمہ مال کے تحصیلداروں و دیگر حکام کے نام جاری کئے گئے سرکلر میں کہا گیا ہے کہ ٹارگٹ کے حصول میں تمام تر محکمانہ کوششوں کو بروئے کار لایا جائے تاکہ زیادہ سے زیادہ وصولی کا عمل مکمل کرنے میں مدد مل سکے۔ انہوںنے زرعی انکم ٹیکس ، آبیانہ اور دیگر سرکاری واجبات کی وصولی کی رفتار مزید تیز کرنے کی ضرورت پر بھی زور دیتے ہوئے کہا کہ آئندہ سے ریکوری کی تفصیلات کو ہر ہفتے چیک کیا جائے گا اور ٹارگٹ کے حصول میںکوئی رکاو ٹ برداشت نہیں کی جائے گی۔