اعلیٰ ثانوی تعلیمی بورڈ نے انٹر سال اول کامرس ریگولر کے نتائج کا اعلان کردیا

چالیس فیصد امیدواربھی کامیاب نہیں ہوسکے جو گرتے ہوئے تعلیمی معیار کی عکاسی کرتا ہے،محمد عمران خان چشتی

پیر 19 دسمبر 2016 21:03

کراچی (اُردو پوائنٹ اخبارتازہ ترین - آن لائن۔ 19 دسمبر2016ء) اعلیٰ ثانوی تعلیمی بورڈ کراچی کے ناظم امتحانات محمد عمران خان چشتی نے انٹرمیڈیٹ ساول اول کامرس ریگولر کے سالانہ امتحانات برائے 2016ء کے نتائج کا اعلان کردیا ہے۔

(جاری ہے)

اس موقع پر محمد عمران خان چشتی نے کہا کہ کامرس ریگولر گروپ سال اول کے امتحانات میں 40 فیصد اُمیدواربھی تمام پرچوں میں کامیابی حاصل نہ کرسکے جو گرتے ہوئے تعلیمی معیار کی عکاسی کرتا ہے، تمام اسٹیک ہولڈرز صورتحال کی سنگینی کو محسوس کرتے ہوئے فوری طور پر تعلیمی معیار کی بہتری کیلئے اقدامات کریں جبکہ طلباء بھی تعلیم کی اہمیت سمجھتے ہوئے اپنی مکمل توجہ پڑھائی پر مرکوز رکھیں۔

نتائج کی تفصیلات بتاتے ہوئے محمد عمران خان چشتی نے کہا کہ کامرس ریگولر کے امتحانات میں 34100 امیدواروں نے رجسٹریشن حاصل کی ،33597 امیدوار امتحانات میں شریک ہوئے جبکہ تمام پرچوں میں کامیاب ہونے والے امیدواروں کی کامیابی کا تناسب تقریباً 37.11فیصد رہا۔ناظم امتحانات محمد عمران خان چشتی نے بتایا کہ کامرس ریگولر گروپ کے امتحانات میں 12463 امیدوار تمام سات پرچوں میں، 5832 چھ پرچوں میں، 4093 پانچ پرچوں میں، 3267 چار پرچوں میں، 2639 تین پرچوں میں،2363 دو پرچوں میں جبکہ 1982امیدوار ایک پرچے میں کامیاب قرار پائے۔#