چین پاکستان اقتصادی راہداری منصوبے (سی پیک) کے تحت پاکستان اورچین کے انفارمیشن ٹیکنالوجی کے شعبہ میں باہمی رابطوں میں نمایاں اضافہ کیا جاسکتا ہے ، وانگ زی ہائی

ہفتہ 17 دسمبر 2016 11:03

اسلام آباد ۔ (اُردو پوائنٹ اخبارتازہ ترین - اے پی پی۔ 17 دسمبر2016ء) پاکستان جوائینٹ چیمبر آف کامرس اینڈ انڈسٹری (پی سی جے سی سی آئی) کے صدر وانگ زی ہائی نے کہا ہے کہ چین پاکستان اقتصادی راہداری منصوبے (سی پیک) کے تحت پاکستان اورچین کے انفارمیشن ٹیکنالوجی کے شعبہ میں باہمی رابطوں میں نمایاں اضافہ کیا جاسکتا ہے جس سے آئی ٹی کے شعبہ کی پاکستانی برآمدات کے حجم کو بڑھانے میں مدد ملے گی انہوں نے کہا کہ پاکستان موبائیل فونز کی ایپس سے ہر ماہ 10 ملین ڈالر کا زرمبادلہ کما رہا ہے انہوں نے کہا کہ دونوں ممالک کے اشتراک سے سی پیک کے تحت نئے منصوبوں اور دو طرفہ تعاون کے فروغ سے پاکستانی برآمدات میں نمایاں اضافہ کیا جا سکتا ہے انہوں نے کہا کہ اس وقت پاکستان میں دو ہزار سے زائد آئی ٹی کمپنیاں کام کر رہی ہیں جو بین الاقوامی معیار کے پروگرام تیار کر کے دنیا بھر کے ممالک کو برآمد کر رہی ہیں اور پاک چین دو طرفہ تعاون سے آئی ٹی کے شعبہ میں معاونت حاصل ہو گی ۔