ریٹائرڈ کمشنرکے گھر سے چوری ہونیوالی کار برآمد، دو کار چور ملزمان گرفتار

وقوع میں استعمال ہونیوالی کار بھی برآمد‘، ملزمان کاتعلق بین الصوبائی گروہ سے ہے

بدھ 14 دسمبر 2016 13:32

میرپور(اُردو پوائنٹ اخبارتازہ ترین - این این آئی۔ 14 دسمبر2016ء) ایس ایس پی میرپورعرفان سلیم نے ایک پریس نوٹ میں بتایا ہے کہ مورخہ10-11-16 کو علی الصبح سیکٹر D/1میں ریٹائرڈ کمشنر چوہدری غلام مصطفیٰ کے گھر کے ملحقہ گیراج سے کار نمبری ED-265 اسلام آباد ٹیوٹا کرولاآلٹس ماڈل2015نامعلوم چور چوری کرکے لے گئے تھے ۔ ملزمان کی تلاش و گرفتاری کیلئے راجہ اظہر اقبال DSPسٹی اور محمدنصیر انسپکٹر SHOتھانہ سٹی میرپور پر مشتمل ایک ٹیم تشکیل دی گئی جنہوں نے دن رات محنت کرکے اس واقعہ میں ملوث کار چوروں کے بین الصوبائی گروہ کو سراغ لگا کر 02 ملزمان۱۔

شیراز ولدسرور شاہ قوم سیدساکن چارسدہ،۲۔محمد اسلم ولد محمد اشرف ساکن مانسہرہ کو گرفتار کرلیا اور انکی نشاندہی پر چوری شدہ کار علاقہ غیر سے برآمد کرلی ہے ۔

(جاری ہے)

ملزمان کے زیر استعمال کار نمبری LED-2380 ٹیوٹا کرولا XLI بھی برآمد کرلی ہے ۔ گرفتار ملزمان کا تعلق چوروں کے بین الصوبائی گروہ سے ہے جو ایبٹ آباد ، ہری پور ، راولپنڈی پولیس کو کار چوری کی متعدد وارداتوں میں مطلوب تھا ۔ ملزمان نے دوران تفتیش کار چوری کی متعدد وارداتوں کاانکشاف کیا ہے ۔ اس گروہ کے باقی دو ارکان کی گرفتاری کیلئے بھی چھاپے مارے جارہے ہیں۔ اس سے قبل میرپور پولیس نے گزشتہ عرصہ میں بھی کارچوروں کا ایک بین الصوبائی گروہ گرفتار کرکے 17چوری شدہ کاریں برآمد کی ہیں۔