ملتان سمیت جنوبی پنجاب کے علاقے ہفتہ کو بھی شدید دھند کی لپیٹ میںرہے،کئی مقامات پرحدنظرصفر

موٹروے بند،ملتان ائیرپورٹ پر فلائٹ آپریشن بھی معطل رہا

ہفتہ 10 دسمبر 2016 18:27

ملتان(اُردو پوائنٹ اخبارتازہ ترین - آئی این پی۔ 10 دسمبر2016ء) ملتان سمیت جنوبی پنجاب کے علاقے ہفتہ کو بھی شدید دھند کی لپیٹ میں رہے۔کئی علاقوں میں حدنگاہ صفر ہوگئی۔شدید دھند کے سبب ملتان فیصل آباد موٹروے بھی کئی مقامات پر بند رہی جبکہ ملتان ائیرپورٹ پر فلائٹ آپریشن بھی بند رہا۔

(جاری ہے)

جدہ سے ملتان آنے والی پی آئی اے کی فلائٹ پی کے 740 کو دھند کے باعث کراچی کے جناح ٹرمینل پر اتار لیا گیا، ملتان سے اسلام آباد جانے والی پرواز کو بھی منسوخ کر دیا گیا ہے جب کہ کراچی سے ملتان آنے والی ایئربلیو کی پروازکو بھی واپس بھیج دیا گیا، شدید دھند کے باعث اسکول اور دفاتر جانے والوں کو بھی پریشانی کا سامنا ہے ۔

دوسری طرف ترجمان موٹر وے پولیس نے شہریوں کو غیر ضروری سفر سے گریز کرنے کی ہدایت کرتے ہوئے کہا کہ اگر سفر کرنا ہے تو جی ٹی روڈ کو استعمال کیا جائے اور فوگ لائٹس جلا کر کانوائے کی صورت میں سفر کیا جائے، سفر کے دوران ڈرائیور رفتار کم رکھیں اور کانوائے کی صورت میں سفر کرنے کی کوشش کریں۔