توانائی کابینہ کمیٹی کے اجلاس میں کے الیکٹرک کی مجوزہ نئی حصص ہولڈر شنگھائی الیکٹرک پاور کا کراچی الیکٹر ک کی انتظامیہ کے ہمراہ9ارب ڈالرز کی سرمایہ کاری کا اپنا بزنس پلان پیش،حکومت پاکستان کا خیرمقدم

کراچی الیکٹرک کمپنی اپنی سرمایہ کاری کے منصوبے اس طرح کے بنائے کہ بجلی کا ترقیاتی ڈھانچہ اور پیداواری سہولیات حکومت کے 2018ء کے لوڈ شیڈنگ کے خاتمہ کے منصوبہ کے مطابق ہو،حکومت کازور

منگل 6 دسمبر 2016 23:10

اسلام آباد(اُردو پوائنٹ اخبارتازہ ترین - آئی این پی۔ 06 دسمبر2016ء) توانائی کے بارے میں کابینہ کمیٹی کے اجلاس میںکے الیکٹرک کی مجوزہ نئی حصص ہولڈر شنگھائی الیکٹرک پاور نے کراچی الیکٹر ک کی انتظامیہ کے ہمراہ9ارب ڈالرز کی اس سرمایہ کاری کا اپنا بزنس پلان پیش کیا جو کہ کراچی الیکٹرک کمپنی کے انفراسٹرکچرسمیت بجلی کی ترسیل،تقسیم اور بجلی کی پیداوار کو بہتر بنانے کے لئے بنایا گیا ہے جبکہ حکومت پاکستان نے کے الیکٹرک کے حصص ہولڈر میں تبدیلی اور سرمایہ کاری کا خیر مقدم کرتے ہوئے اس ضرورت پر زور دیا کہ کراچی الیکٹرک کمپنی اپنی سرمایہ کاری کے منصوبے اس طرح کے بنائے کہ بجلی کا ترقیاتی ڈھانچہ اور پیداواری سہولیات حکومت کے 2018ء کے لوڈ شیڈنگ کے خاتمہ کے منصوبہ کے مطابق ہو۔

منگل کوتوانائی کے بارے میں کابینہ کمیٹی کی طرف سے تشکیل دی گئی کمیٹی کا اجلاس پانی و بجلی کے وفاقی وزیر خواجہ محمد آصف کی صدارت میں منعقد ہوا۔

(جاری ہے)

یہ اجلاس کراچی الیٹرک کی ٹرانزیکشن پر تبادلہ خیال کرنے کے سلسلہ میں ہوا جس میں وزیر پٹرولیم و قدرتی وسائل، چیئر مین نجکاری کمیشن،چیئر مین سرمایہ کاری بورڈ نے بھی شرکت کی۔ کمیٹی کے اس اجلاس میں وزارت پانی و بجلی،وزارت پٹرولیم و قدرتی وسائل،خزانہ اور قانون و انصاف ڈویژن کے اعلیٰ سطحی نمائندے بھی موجود تھے۔

اجلاس میں کے الیکٹرک کی مجوزہ نئی حصص ہولڈر شنگھائی الیکٹرک پاور نے کراچی الیکٹر ک کی انتظامیہ کے ہمراہ9ارب ڈالرز کی اس سرمایہ کاری کا اپنا بزنس پلان پیش کیا جو کہ کراچی الیکٹرک کمپنی کے انفراسٹرکچرسمیت بجلی کی ترسیل،تقسیم اور بجلی کی پیداوار کو بہتر بنانے کے لئے بنایا گیا ہے۔ شنگھائی الیکٹرک پاور چین میں بجلی کے شعبہ کی سب سے بڑی کمپنیوں میں سے ایک ہے۔

اس کمپنی کے ماہرین نے اجلاس میں کمپنی کے پروفائل،بین الاقوامی سطح کی مہارت اور اس قسم کے تجربہ بارے بتایا۔ حکومت پاکستان نے کے الیکٹرک کے حصص ہولڈر میں تبدیلی اور سرمایہ کاری کا خیر مقدم کیا ہے۔ حکومت پاکستان نے اس بات کی ضرورت پر زور دیا کہ کراچی الیکٹرک کمپنی اپنی سرمایہ کاری کے منصوبے اس طرح کے بنائے کہ بجلی کا ترقیاتی ڈھانچہ اور پیداواری سہولیات حکومت کے 2018ء کے لوڈ شیڈنگ کے خاتمہ کے منصوبہ کے مطابق ہو۔ حکومت پاکستان نے کے الیکٹرک کے صارفین کو بجلی کی فراہمی اور بجلی کے معیار میں بہتری لانے کی کوششوں میں معاونت کا بھر پور یقین دلایا ہے۔