وزیراعظم کی زیرصدارت ن لیگ پنجاب کے رہنمائوں کااجلاس

اسلام آباد (اُردو پوائنٹ اخبارتازہ ترین - آئی این پی۔ 06 دسمبر2016ء) وزیراعظم نواز شریف کی زیرصدارت ن لیگ پنجاب کے رہنمائوں کے اجلاس میں فیصلہ کیاگیا ہے کہ راولپنڈی کے میئر سردار نسیم اوردیوان عباس بخاری ضلع کونسل ملتان کے چیئرمین ہونگے فیصل آباد شہر کامیئر رانا ثنا اللہ گروپ سے ہو گا ،چکوال اورضلع کونسل فیصل آباد کے چیئرمین کے فیصلہ کیلئے کمیٹی تشکیل دیدی گئی۔

منگل کو یہاں وزیر اعظم ہائوس میں وزیر اعظم نوازشریف کی زیر صدارت ہونے والے ن لیگ پنجاب کے اجلاس میں وزیرداخلہ چوہدری نثارعلی خان ،وزیرمنصوبہ بندی احسن اقبال ، وزیر قانون پنجاب رانا ثنا اللہ ، حمزہ شہباز شریف ، پرویز ملک ،پرویز رشید ، آصف کرمانی ،اشفاق سرور ،سعود مجید سمیت دیگر رہنما شریک ہوئے۔

(جاری ہے)

اجلاس میں میئر، ڈپٹی میئر اور چیئرمین ضلع کونسل کے ناموں پر غور کیا گیا۔

اس ضمن میں ن لیگ نے بڑے شہروں کے میئرز کے ناموں کو فائنل کر لیا ۔ اجلاس میں میئر میونسپل کارپوریشن راولپنڈی کیلئے سردار نسیم میئر ہونگے جبکہ میئر لاہور کے امیدواروں کی لسٹ سے خواجہ حسان کو آئوٹ کر کے کرنل(ر) شہباز اور خاتون امیدوار کے ناموں پر غور کیا گیا اجلاس میں فیصلہ کیا گیا کہ میئر لاہور کا اعلان وزیر اعظم (آج ) دونوں امیدواروں سے ملاقات کے بعد کریں گے۔

اس اجلاس میں وفاقی وزیر داخلہ چودھری نثار ، وفاقی وزیر پیٹرولیم شاہد خاقان عباسی اور پارلیمانی سیکرٹری جاوید اخلاص بھی شریک ہونگے۔ وزیراعظم کی زیر صدارت اجلا س میں فیصلہ کیا گیا ہے کہ فیصل آباد شہرکا میئر رانا ثنا اللہ گروپ سے ہو گا تاہم ضلع کونسل فیصل آباد کے چیئرمین کا نام فائنل کرنے کیلئے کمیٹی تشکیل دیدی گئی۔اجلاس میں فیصلہ کیاگیا کہ دیوان عباس بخاری ضلع کونسل ملتان کے چیئرمین ہونگے دیوان عباس بخاری لیگی رہنما دیوان عاشق بخاری کے صاحبزادے ہیں جبکہ ملتان کے میئر کا فیصلہ آج رات ہو گااوکاڑہ ڈسٹرکٹ کونسل چیئرمین کیلئے کمیٹی تشکیل دیدی گئی۔

چکوال سے متعلق فیصلے کے لئے رہنمائوں کو (آج ) لاہور طلب کرلیاگیا ۔اجلاس سے خطاب میں وزیراعظم نواز شریف نے کہا کہ بلدیاتی حکومتوں کے فعال نظام کے بغیر جمہوریت مستحکم نہیں ہوسکتی۔ انہوں نے کہا کہ بلدیاتی نظام حکومت نئی قیادت کیلئے نرسری اور تربیتی ادارہ ہے۔اجلاس میں پاکستان مسلم لیگ ن پنجاب کے رہنمائوں نے شرکت کی۔وزیراعظم نے کہا کہ بلدیاتی ادارے صوبائی اور وفاقی سطح پر اچھی قیادت سامنے لاتے ہیں۔