․بلاول بھٹو زرداری کولاڑکانہ سے قومی اسمبلی کی نشست این اے 207سے بلامقابلہ منتخب کرانے کی پیپلزپارٹی سندھ کی کوششیں ناکام ہوگئیں

کراچی (اُردو پوائنٹ اخبارتازہ ترین - این این آئی۔ 06 دسمبر2016ء) پاکستان پیپلزپارٹی کے چیئرمین بلاول بھٹو زرداری کولاڑکانہ سے قومی اسمبلی کی نشست این اے 207سے بلامقابلہ منتخب کرانے کی پیپلزپارٹی سندھ کی کوششیں ناکام ہوگئیں، این اے دوسوسات پرپیپلزپارٹی کے دیرینہ حریف جے یوآئی کے خالد محمود سومرو کے صاحبزادے راشد محمود سومرو نے بلاول کے مقابلے میں الیکشن لڑنے کا اعلان کردیا ہے۔

پاکستان پیپلزپارٹی کے چیئرمین بلاول بھٹو زرداری کولاڑکانہ سے قومی اسمبلی کی نشست این اے دوسوسات سے بلامقابلہ منتخب کراکے قومی اسمبلی میں پہنچانے اورانہیں قائد حزب اختلاف بنوانے کے پی پی کے ارمانوں پراس وقت اوس پڑگئی جب حکومت سندھ کے ایک مشیراورپیپلزپارٹی سندھ کی ایک اہم شخصیت کے جے یوآئی سے بیک ڈوررابطے ناکام ہوگئے اورگذشتہ دوہفتوں سے ہونے والی ملاقاتیں نتیجہ خیز نہ ہوسکیں ۔

(جاری ہے)

بلاول بھٹو کی والدہ شہید بے نظیربھٹو کے مقابل این اے دوسوسات لاڑکانہ سے ہربارانتخاب میں حصہ لینے والے جے یوآئی سندھ کے سابق سیکریٹری جنرل مرحوم علامہ ڈاکٹرخالد محمود سومرو کے صاحبزادے اورجے یوآئی سندھ کے موجودہ سیکریٹری جنرل علامہ راشد محمود سومرو نے بلاول بھٹو کے مقابلے میں الیکشن میں حصہ لینے کا اعلان کرکے بلاول بھٹو کوبلامقابلہ کامیاب کرانے کی پیپلزپارٹی کی چال ناکام بنادی ۔

انتہائی معتبرترین ذرائع کے مطابق علامہ راشد محمود سومرو کی جانب سے بلاول بھٹو کے مقابل الیکشن لڑنے کے اعلان کے بعد پیپلزپارٹی کی اعلی قیادت نے اب جے یوآئی کے قائد مولانافضل الرحمن سے رابطے کا فیصلہ کیا ہے لاڑکانہ کی سطح پرسومروخاندان کومنانے میں ناکامی کے بعد پیپلزپارٹی سندھ کی قیادت پرمرکزی قیادت نے برہمی کا اظہارکیا ہے اورہدایت کی ہے کہ بلاول بھٹو کوہرصورت این اے دوسوسات لاڑکانہ سے بلامقابلہ منتخب کرایا جائے ۔

پیپلزپارٹی سندھ کی ناکامی کے بعد اب پیپلزپارٹی کے مرکزی قیادت نے اپنا کردار ادا کرنے کا فیصلہ کیا ہے اوراس سلسلہ میں پیپلزپارٹی پارلیمنٹرینزکے سربراہ آصف علی زرداری جے یوآئی (ف ) کے قائد مولانا فضل الرحمن سے رابطہ کرکے انہیں لاڑکانہ کی نشست پربلاول بھٹو کے مقابل امیدوارنہ لانے پرآمادہ کریں گے۔