آرمی چیف جنرل قمر جاوید باجوہ سے چینی کمانڈر جنرل ژائو یونگ چی کی ملاقات

علاقائی سیکیورٹی ، پیشہ وارانہ دلچسپی کے امور پر تبادلہ خیال سی پیک کی سیکیورٹی کیلئے پاک فوج اپنی غیر متزلزل حمایت جاری رکھے گی، جنرل قمر جاوید باجوہ جنرل ژائو یونگ چی کا دہشت گردی کیخلاف جنگ ،علاقائی امن واستحکام کیلئے مسلسل کوششوں پر پاکستان آرمی کو خراج تحسین

پیر 5 دسمبر 2016 16:57

راولپنڈی (اُردو پوائنٹ اخبارتازہ ترین - این این آئی۔ 05 دسمبر2016ء) آرمی چیف جنرل قمر جاوید باجوہ اور چینی کمانڈر جنرل ژائو یونگ چی نے علاقائی سیکیورٹی اور پیشہ وارانہ دلچسپی کے امور پر تبادلہ خیال کیا ہے جبکہ پاک فوج کے سربراہ نے سی پیک کی سیکیورٹی کیلئے پاک فوج کی غیر متزلزل حمایت کا اعادہ کیا ہے۔ آئی ایس پی آر کے مطابق جنرل قمر جاوید باجوہ سے چین کی پیپلز لبریشن آرمی کے کمانڈر جنرل ژائو یونگ چی نے پیر کو جی ایچ کیو میں ملاقات کی۔

(جاری ہے)

جنرل ژائو یونگ چی نے جنرل قمر جاوید باجوہ کو پاک فوج کی کمان سنبھالنے پر مبارکباد پیش کی، ملاقات کے دوران علاقائی سیکیورٹی اور پیشہ وارانہ دلچسپی سے متعلق امور زیر غور لائے گئے۔ چینی جنرل نے دہشت گردی کیخلاف جنگ اور علاقائی امن واستحکام کیلئے مسلسل کوششوں پر پاکستان آرمی کو خراج تحسین پیش کیا۔ آرمی چیف جنرل قمر جاوید باجوہ نے سی پیک کی سیکیورٹی کیلئے پاک فوج کی غیر متزلزل حمایت کا اعادہ کیا ، قبل ازیں جی ایچ کیو آمد پر پاکستان آرمی کے ایک چاک وچوبند دستے نے چینی جنرل کو گارڈ آف آنر پیش کیا۔ پاک فوج کے شہداء کو خراج عقیدت پیش کرنے کیلئے چینی کمانڈر نے یادگار شہداء پر پھولوں کی چادر چڑھائی۔