وفاقی محتسب نے تمام وزارتوں و محکموں کو نئے نظام کے تحت شکایت کا 15دن کے اندر فیصلہ کرنے کی ہدایت کی ہے،احسان کھوکھر

لاہور۔04 دسمبر(اُردو پوائنٹ اخبارتازہ ترین - اے پی پی۔ 04 دسمبر2016ء) وفاقی محتسب کے سینئر ایڈوائزر اور سمند ر پار پاکستانیوں کے گریوینس کمشنر حافظ احسان احمد کھوکھر نے کہا ہے کہ وفاقی محتسب محمد سلمان فاروقی نے تمام وفاقی وزارتوں اور محکموں کو ہدایت کی ہے کہ وہ شکایات کے ازالہ کے نئے نظام کے تحت درج کرائی گئی ہر شکایت کا 15دن کے اندراندر فیصلہ کریں،انہوںنے کہا کہ نئے شکایاتی نظام کے تحت سرکاری اداروں میں 18 مراکز کاقیام عمل میں لایا گیا ہے اور متعلقہ محکموں کے مجاز افسران کی طرف سے اعلی سرکاری افسران کا ان شکایاتی مراکز میں بحثیت فوکل پرسن اور عوامی شکایات کے ازالہ آفیسر کے طور پر تقرر کیا گیا ہے تاکہ وہ عوامی شکایات کا فوری ازالہ کر سکیں،نئے نظام کے تحت محکموں کو پابند کیا گیا ہے کہ وہ کم از کم وقت میں شکایات کے ازالہ کو یقینی بنائیں اور اس سلسلہ میں ماہانہ کارکردگی رپورٹ دفاقی محتسب آفس بھیجا کریں،اگر سرکاری محکمے 15دن کے اندر شکایت کے ازالہ میں ناکام رہے تو شکایت کنندہ کو حق حاصل ہوگا کہ وہ وفاقی محتسب آفس شکایت کرے یا پھر ویب سائٹ کے ذریعے شکایت خودبخود وفاقی محتسب آفس کی ویب سائٹ پر منتقل ہو جائے گی، سرکاری محکمے نئے نظام کے تحت دفاتر میں شکایات کے اندراج کا مخصوص ریکارڈ رکھیں، انہوں نے کہا کہ ہزاروں درخواستیں صرف محکموں میں بدانتظامی سے متعلق ہیں ، وفاقی وازارتوں اور محکموں کویہ بھی ہدایت جاری کی گئی ہیں کہ وہ وفاقی محتسب آفس میں اپنے فوکل پرسنز کے نمبرز ، ویب سائٹس اور اڈریس بھی آویزاں کریں، انہوں نے مزید کہا کہ نئے نظام کے تحت فوکل پرسن اپنے دفاتر اور ویب سائٹ کے ذریعے رابطہ میں رہیں گے تاکہ عوام کو شکایا ت درج کرانے کے لیے ان تک آسان رسائی حاصل ہو جو ان کی حدود میں آتی ہوں، انہوں نے کہا کہ وفاقی محتسب سیکرٹریٹ نے اب تک 3لاکھ عوامی شکایات کا ازالہ کر دیا ہے جن پر 45دن کے اندر اندر فیصلہ کیا گیا ہے جو ایک مثال ہے،آئندہ درج ہونے والی ہرشکایت پر 15دن کے اندر فیصلہ کیا جائے گا۔