باغبانوں کو آم ، لیچی ، پپیتا ، کیلا ، ترشاوہ پھلوں ، کاغذی لیموں ، لیمن کو کورے سے بچانے کی ہدایت

اتوار 4 دسمبر 2016 13:50

فیصل آباد۔04 دسمبر(اُردو پوائنٹ اخبارتازہ ترین - اے پی پی۔ 04 دسمبر2016ء) ماہرین زراعت نے باغبانوں کوآم ، لیچی ، پپیتا ، کیلا ، ترشاوہ پھلوں ، کاغذی لیموں ، لیمن کو کورے سے بچانے کی ہدایت کی ہے اور کہاہے کہ چونکہ کورا ان سدابہار پودوں اور ا س کے پھل کو بری طرح متاثر کرتاہے لہٰذا باغبان اس جانب خصوصی توجہ مرکوز کریں کیونکہ بعض اوقات پھلدار پودے کورے کی وجہ سے مکمل طور پر تباہ ہو جاتے ہیں اور زیادہ دھندمیںپودوں کی ٹہنیاں بھی خشک ہو جاتی ہیں جس سے باغبانوں کو شدید مالی نقصان کا سامناکرناپڑسکتاہے ۔

ایک ملاقات کے دوران ماہرین زراعت نے بتایاکہ دسمبر اور جنوری کے دو مہینے زیادہ کوراپڑنے کے مہینے ہوتے ہیں جبکہ بعض اوقات فروری کے مہینوں میں بھی کورا پڑ سکتاہے۔

(جاری ہے)

انہوںنے کہاکہ پھلدار پودوں کی کامیاب اور نفع بخش کاشت کا انحصار ان کی مناسب دیکھ بھال پر ہوتاہے ۔ انہوںنے بتایاکہ سخت سردی ، سخت گرمی ، ژالہ باری اور آندھیوں سے باغات کے چھوٹے و بڑے پودے بری طرح متاثر ہوتے ہیں۔

انہوںنے کہاکہ کورے کے دنوں میں جب رات کو پودوں پر کوراپڑتاہے تو شدید ٹھنڈک کی وجہ سے پودے کے پتوں اور پھل پر پانی جم جاتاہے جس کے بلحاظ حجم پھیلنے کے عمل سے پتوںکے خلیے ٹوٹ جاتے ہیں اور اس طرح پتے خشک ہو نا شروع ہو جاتے ہیں جس سے پودوں کو ناقابل تلافی نقصان پہنچتاہے اور پیداوار بھی متاثر ہوتی ہے ۔انہوںنے کہاکہ باغبان اس سلسلہ میں محکمہ زراعت کے حکام یا ماہرین زراعت کی خدمات بھی حاصل کرسکتے ہیں تاکہ حفاظتی و احتیاطی تدابیر سے پودوں کو کورے سے بچانا ممکن ہو سکے۔