گورنر سندھ سعید الزماں صدیقی کا کھارا در کے قریب مارکیٹ میں لگنے والی آگ پر تشویش کا اظہار

کمشنر کراچی اور متعلقہ حکام کو آگ پر قابو پانے کیلئے موثر اقدامات کی ہدایت

جمعہ 2 دسمبر 2016 20:35

ْکراچی(اُردو پوائنٹ اخبارتازہ ترین - آن لائن۔ 02 دسمبر2016ء) گورنر سندھ جسٹس(ر)سعید الزماں صدیقی نے کراچی کے علاقہ کھارا در کے قریب واقع مارکیٹ میں لگنے والی آگ پر تشویش کا اظہار کرتے ہوئے کمشنر کراچی اور متعلقہ حکام کو آگ پر قابو پانے کیلئے موثر اقدامات کی ہدایت کی ہے۔ گورنر سندھ نے متعلقہ حکام کو آگ لگنے کی وجوہات کی رپورٹ جلد از جلد پیش کرنے کی بھی ہدایت کی ہے ۔

(جاری ہے)

انہوں نے کہا کہ فوری اور موثر اقدامات کے ذریعہ آگ پر قابو پا کر مزید نقصان سے بچا جاسکتا ہے اس ضمن میں شہر بھر کی فائر بریگیڈز گاڑیوں کو وقت ضرورت فوری طلب کیا جائے۔گورنر سندھ نے کمشنر کراچی کو ہدایت کی ہے کہ آگ لگنے کا واقعہ میں شر پسندی، انسانی غلطی یا حاد ثہ کے تعین کیلئے تحقیقات کی جائے اور آگ لگنے کی اصل وجوہات کے سامنے آنے پر مستقبل میں اس کے تدارک کیلئے موئثر اقدامات اٹھائے جائیں تاکہ آئندہ اس قسم کے واقعات سے محفوظ رہا جاسکے۔ گورنر سندھ نے کہا کہ فوری رسپانس کیلئے فائر بریگیڈ کا جدید نظام وضع کرنا وقت کی اہم ضرورت ہے ۔ #