گرم ملبوسات کی قیمتوں میں اضافے کے باوجود ان کی خریداری بڑھ گئی

اسلام آباد ۔ (اُردو پوائنٹ اخبارتازہ ترین - اے پی پی۔ 25 نومبر2016ء) درجہ حرارت میں کمی کے باعث گرم ملبوسات کی قیمتوں میں اضافہ ہوگیا ہے۔ دستانوں، موزوں، اونی ٹوپیوں، مفلرز، سویٹرز،جیکٹس سمیت دیگر گرم کپڑوں کی خریداری میں اضافہ ہوگیا ہے۔ آبپارہ، ملیوڈی، جناح سپر مارکیٹ، ستارہ مارکیٹ، پشاور موڑ،کراچی کمپنی، فیض آباد، کمرشل مارکیٹ، صدر، راجہ بازار اور دیگر بازاروں میں گرم ملبوسات کی فروخت کا سلسلہ جاری ہے۔

(جاری ہے)

ایک دکاندار حشمت خان نے ’’اے پی پی‘‘ کو بتایا کہ ان دنوں سردیوں کے ملبوسات کی فروخت میں اضافہ ہونے سے ہمارا کاروبار بھی بڑھ گیا ہے۔ خریداری کے لئے آئے ایک شخص یاسر وقار نے کہا کہ شدید سردی کے باعث اپنی فیملی کے لئے گرم کپڑے خریدنا ضروری ہوگیا ہے۔ انہوں نے کہا کہ بالخصوص بچوں کو گرم کپڑوں کی زیادہ ضرورت ہے اور اس سلسلے میں کسی قسم کی غفلت کا مظاہرہ نہیں کرنا چاہئے اکثر لوگ سٹالز اور ریڑھیوں پر فروخت ہونے والے گرم ملبوسات خریدنے میں مصروف ہیں جبکہ شدید سردی سے بیماریوں میں بھی اضافہ ہورہا ہے اور شہری ہسپتالوں کا رخ کررہے ہیں۔ ماہرین صحت نے کہا ہے کہ خشک سردی سے بچنے کیلئے گرم ملبوسات کا استعمال ضروری ہے۔