کسی بھی ملک کی ترقی میں اساتذہ کا کلیدی کردار ہوتا ہے ،کورکمانڈر ملتان

ملتان۔22 نومبر(اُردو پوائنٹ اخبارتازہ ترین - اے پی پی۔ 22 نومبر2016ء) فیڈرل گورنمنٹ ایجوکیشن انسٹیٹیوشنزمیںسالانہ تقریب ِتقسیم انعامات کا انعقاد ہوا جس کے مہمانِ خصوصی کمانڈر ملتان کور لیفٹیننٹ جنرل اشفاق ندیم احمد تھے جنہوں نے اعلیٰ کارکردگی دکھانے والے طلباء وطالبات میں انعامات تقسیم کئے ۔تقریب کے شرکاء سے خطاب کرتے ہوئے کمانڈر ملتان کور لیفٹیننٹ جنرل اشفاق ندیم احمد نے کہا کہ میرے لیے یہ انتہائی خوشی کا با عث ہے اور میں تمام اساتذہ کرام و طلباء و طالبات کی شاندار کار کردگی کو سراہتا ہوں اور ان کو دل کی گہرائیوں سے مبارک باد پیش کرتا ہوں ۔

مجھے پورا یقین ہے کہ ایسے ہونہار طلباء و طالبات مستقبل میں پاکستان کا نام اقوام عالم میں مزید اونچا کریں گے ۔

(جاری ہے)

میں اس موقع پر بچوں کی طرف سے پیش کئے جانے والے ملی نغموں اور ٹیبلوز میں اُن کی کار کردگی پر بھی مبارک باد دیتا ہوں ۔ کورکمانڈر نے مزیدکہاکہ آج کے اس پر مسرت موقع پر یہ بتانا ضروری ہے کہ ان تمام تعلیمی اداروں میں میری اولین ترجیح طلباء کو ’ ’ بہترین انسان ‘‘ بنانا ہے ۔

اس مقصد کے حصول کیلئے اساتذہ کرام سے گزارش ہے کہ تدریسی عمل کے ساتھ ساتھ بچوں کی تربیت پر خاص توجہ دیں ۔ میں والدین سے بھی امید کرتا ہوں کہ وہ اپنے بچوں کو گھر کے اندر ایسا ماحول فراہم کریںگے جس سے ان کی تعلیم و تربیت میں بہتری آئے ۔ ایک صحت مند جسم ہی صحت مند دماغ کا حامل ہوتا ہے اس لیے ہم کھیلوں کے فروغ کیلئے تمام وسائل بروئے کار لائیں گے تاکہ تعلیم کے ساتھ ساتھ طلباء کی جسمانی صلاحیتوں کی بھی جلا بخشی جائے ۔

میں آپ کو نصیحت کرتا ہوں کہ آپ کھیلوں میں بڑھ چڑھ کر حصہ لیں اور اپنے اندر سپورٹس مین سپرٹ پیدا کریں اور ہر مشکل میں صبر و برداشت سے کام لینا سیکھیں ۔ آپ کو یقین دلاتاہوں کہ تمام کھلاڑیوں بالخصوص ریجنل سطح کے کھلاڑیوں کی ہر لحاظ سے حوصلہ افزائی کی جائے گی ۔کسی بھی ملک کی ترقی میں اساتذہ کا کلیدی کردار ہوتا ہے ۔ا ٓپ قوم کے وہ معمار ہیں جو ملک کے روشن مستقبل کی خاطر شب وروز محنت میں مشغول رہتے ہیں۔

ہم اس کوشش میں ہیں کہ ملتان ریجن کے تمام تعلیمی ادارے اعلیٰ مقام حصل کریں ۔ اس مقصد کے لئے ملتان اور اوکاڑہ میں ماڈل سکول بنائے جا رہے ہیں ۔ پہلے مرحلے میں ان میں ہر طرح کی سہولیات مہیا کی جارہی ہیں ۔ اور آئندہ بھی دستیاب وسائل سے آپ کی بھر پور حوصلہ افزائی کرتے رہیں گے ۔ اب آپکی ذمہ داری ہے کہ آپ اپنے فرائض انتہائی لگن ، جذبہ ء حب الوطنی اور محنت سے ادا کریں تاکہ ہماری آئندہ آنے والی نسلوں کا مستقبل محفوظ ہو سکے ۔ فیڈرل گورنمنٹ ایجوکیشن کے سالانہ نتائج کے مطابق زینب مہدی نے پہلی ، سدرہ حسنین نے دوسری ، محمد عمیر حیات نے تیسری پوزیشن حاصل کی ۔ تقریب میں بچوں کے والدین کی کثیر تعداد نے شرکت کی۔