ڈیکوریشن لائٹس کی ویلیوایشن میں بھاری اضافہ فوراً واپس لیا جائے ،لاہور چیمبر ..
تازہ ترین : 1

ڈیکوریشن لائٹس کی ویلیوایشن میں بھاری اضافہ فوراً واپس لیا جائے ،لاہور چیمبر کا مطالبہ

لاہور۔16 نومبر(اُردو پوائنٹ اخبارتازہ ترین۔ 16 نومبر2016ء)لاہور چیمبر آف کامرس اینڈ انڈسٹری کے صدر عبدالباسط اور نائب صدر محمد ناصر حمید خان نے ڈائریکٹوریٹ جنرل آف ویلیوایشن سے مطالبہ کیا ہے کہ ڈیکوریشن لائٹس کی ویلیوایشن میں بھاری اضافہ فی الفور واپس لیا جانا چاہئے کیونکہ اس شعبہ سے وابستہ تاجر متاثر ہورہے ہیں اور عید میلاد النبیؐ کی تقریبات بھی متاثر ہونے کا خدشہ ہے کیونکہ یہ زیادہ تر انہی ایام میں استعمال ہوتی ہیں۔

طلحہ طیب بٹ اور شاہ رخ جمال کی سربراہی میں شاہ عالم مارکیٹ کے ایک بڑے تجارتی وفد سے گفتگو کرتے ہوئے لاہور چیمبر کے عہدیداروں نے کہا کہ وفاقی وزیر خزانہ محمد اسحاق ڈار، چیئرمین فیڈرل بورڈ آف ریونیو اور ڈائریکٹوریٹ جنرل آف ویلیوایشن کو اس معاملے کا فوری نوٹس لینا چاہئے ۔ وفد نے لاہور چیمبر کے عہدیداروں کو آگاہ کیا کہ ڈیکوریشن لائٹس (رائس لائٹس) کے بہت سے کنٹینرز لاہور اور کراچی میں کھڑے ہیں کیونکہ ویلیوایشن میں بہت بھاری اضافے کی وجہ سے تاجر یہ کنٹینرز کلیئر کروانے سے قاصر ہیں ۔

انہوں نے کہا کہ ڈیکوریشن لائٹس پر ویلیوایشن کی شرح 1.3ڈالر فی کلوگرام تھی جسے بڑھاکر 4ڈالر فی کلوگرام کردیا گیا، محدود وسائل کی وجہ سے تاجر اتنے بھاری اضافے کے متحمل نہیں ہوسکتے۔ انہوں نے کہا کہ یہ آرائشی لائٹس بالخصوص عید میلاد النبیؐ کی تقریبات میں استعمال ہوتی ہیں ، اگر ویلیوایشن کی شرح میں کمی نہ ہوئی اور یہ کنٹینرز کلیئر نہ ہوسکے تو اس مرتبہ عید میلاد النبیؐ کی تقریبات کے لیے ان آرائشی لائٹس کی شدید قلت ہوجائے گی۔ انہوں نے مطالبہ کیا کہ ڈائریکٹوریٹ جنرل آف ویلیوایشن یہ مسئلہ فوراً حل کرے اور آئندہ ویلیوایشن میں بھاری اضافے جیسے اقدامات اٹھانے سے قبل لاہور چیمبر آف کامرس اینڈ انڈسٹری اور دیگر تجارتی تنظیموں کو اعتماد میں لیا جائے۔

مزید متعلقہ خبریں پڑھئیے‎ :

وقت اشاعت : 16/11/2016 - 18:47:10

متعلقہ عنوان :

اپنی رائے کا اظہار کریں