چینی سرمایہ کاروں کی سندھ میں ٹرانسپورٹ کے مختلف منصوبوں میں دلچسپی قابل تحسین ہے،وزیر ٹرانسپورٹ سندھ

کراچی ۔ (اُردو پوائنٹ اخبارتازہ ترین - اے پی پی۔ 09 نومبر2016ء) وزیر ٹرانسپورٹ سندھ سید ناصر حسین نے کہاہے کہ چینی سرمایہ کاروں کی سندھ میں ٹرانسپورٹ کے مختلف منصوبوں میں دلچسپی قابل تحسین ہے،غیر ملکی سرمایہ کاری کی سندھ حکومت کے مختلف منصوبوں میں بڑھتی ہوئی دلچسپی نا صرف صوبے سندھ بلکہ ملک کے معاشی استحکام اور روزگار کے مواقعوں میں اضافہ کی ضمانت ہے ۔

ان خیالات کا اظہار انہوں نے اپنے دفتر میں چین کے سرمایہ کاروں کے ایک وفد سے ملاقات کے موقع پر کیا جسکی قیادت بیجنگ سے تعلق رکھنے والی کمپنی نارینکو انٹر نیشنل کے مسٹر وانگ کر رہے تھے ۔ وفد میں زانگ ، مازیارون ، کو آرڈینٹراسد عالم نیازی شامل تھے جبکہ سیکریٹری ٹرانسپورٹ طہٰ فاروقی اور ڈائریکٹر میڈیا مینجمنٹ منسٹر ٹرانسپورٹ محمد شبیہ صدیقی بھی اس موقعہ پر موجود تھے۔

(جاری ہے)

چینی سرمایہ کاروں کے وفد نے اس موقع پر حکومت سندھ کے ٹرانسپورٹ کے مختلف منصوبوں خصوصاً براؤن لائن پروجیکٹ میں سرمایہ کاری کیلئے پیشکش کی۔ وفد نے صوبائی وزیر کو بتایا کہ وہ صوبہ سندھ میں مرحلہ وار 14ہزار جدید بسیں چلانے کا نظام قائم کرنا چاہتے ہیں جن میں 4ہزار بسیں کراچی اور 10ہزار بسیں صوبہ کے مختلف اضلاع میں مرحلہ وار بتدریج چلانے کا منصوبہ شامل ہے اسکے علاوہ وہ کراچی میں ایک ٹیکنکل انسٹیٹیوٹ بھی قائم کرنا چاہتے ہیں جہاں پر نوجوانوں کو ڈرائیونگ ، میکنک اورٹکٹنگ سمیت دیگر امور پر تربیت فراہم کی جائیگی ۔

وفد نے صوبائی وزیر کی تجویز پر کراچی میں بسیں تیارکرنے کا ایک جدید پلانٹ لگانے میں سرمایہ کاری کی بھی پیشکش کی اور وزیر ٹرانسپورٹ کی تجویز کو سراہا ۔ سیکریٹری ٹرانسپورٹ طہٰ فاروقی نے اس موقع پر چینی وفد کو سندھ میں جاری ٹرانسپورٹ کے منصوبوں کے بارے میں تفصیلات سے آگاہ کیا ۔ چینی وفد نے سیکریٹری ٹرانسپورٹ کی بریفنگ اور حکومت سندھ کے منصوبوں کی تعریف کی ۔ اجلاس سے قبل ڈائریکٹر جنرل کراچی ماس ٹرانزٹ اسد اللہ نے وزیر ٹرانسپورٹ ناصر حسین شاہ کی ہدایت پر چائینز سرمایہ کاروں کے وفد کو براؤن لائن منصوبہ کے روٹ کا تفصیلی دورہ کرایا ۔