مینز جونیئر ہاکی ورلڈ کپ 8 دسمبر سے شروع ہو گا٬ پاکستانی ٹیم 9 دسمبر کو ہالینڈ کے خلاف مہم کا آغاز کرے گی

منگل 8 نومبر 2016 11:27

نئی دہلی ۔ 08 نومبر(اُردو پوائنٹ اخبارتازہ ترین - اے پی پی۔ 08 نومبر2016ء) گیارہواں مینز جونیئر ہاکی ورلڈ کپ رواں برس 8 سے 18 دسمبر تک بھارت میں کھیلا جائے گا جس میں جرمنی کی ٹیم ٹائٹل کا دفاع کرے گی۔ پاکستانی ٹیم 9 دسمبر کو ہالینڈ کے خلاف میچ سے مہم کا آغاز کرے گی۔

(جاری ہے)

انٹرنیشنل ہاکی فیڈریشن (ایف آئی ایچ) کی طرف سے جاری کردہ بیان کے مطابق 11 روز تک جاری رہنے والے ایونٹ میں 16 ممالک کی ٹیمیں عالمی ٹائٹل کے حصول کیلئے ایکشن میں دکھائی دیں گی٬ ان ٹیموں کو چار گروپس میں تقسیم کیا گیا ہے٬ گروپ اے میں ارجنٹائن٬ آسٹریلیا٬ آسٹریا اور کوریا٬ گروپ بی میں پاکستان٬ ہالینڈ٬ بیلجیئم اور مصر٬ گروپ سی میں دفاعی چیمپئن جرمنی٬ جاپان٬ نیوزی لینڈ اور سپین جبکہ گروپ ڈی میں کینیڈا٬ انگلینڈ٬ بھارت اور جنوبی افریقہ شامل ہیں٬ پاکستانی ٹیم 9 دسمبر کو ابتدائی میچ میں ہالینڈ کے مدمقابل ہو گی٬ گرین شرٹس دوسرا میچ 11 دسمبر کو مصر جبکہ تیسرا اور آخری میچ 12 دسمبر کو بیلجیئم کے خلاف کھیلے گی۔

12 دسمبر تک گروپ میچز کھیلے جائیں گے٬ 13 دسمبر کو آرام کا دن ہو گا جس کے بعد 14 دسمبر سے کلاسیفکیشن میچز شروع ہوں گے٬ میگا ایونٹ کے سیمی فائنلز 16 دسمبر کو کھیلے جائیں گے جبکہ دو ٹاپ ٹیموں کے درمیان فائنل 18 دسمبر کو کھیلا جائے گا۔