وزیر داخلہ تحریک انصاف کا دھرنا منصوبہ سامنے لے آئے

فہد شبیر اتوار 30 اکتوبر 2016 17:02

اسلام آباد (اُردو پوائنٹ اخبارتازہ ترین۔30اکتوبر۔2016ء) پی ٹی آئی کے اسلام آباد کو 2 نومبر کو بند کرنے کے اعلان کے حوالے سے وفاقی وزیر داخلہ چوہدری نثار نے کہا کہ اسکولوں کا کھلا رہنا، ہسپتالوں کے راستے کھلے رہنا، شہریوں کی زندگی متاثر نہ ہونا، سرکاری دفاتر، سپریم کورٹ اور ہائی کورٹ کھلے رہنا میری ذمہ داری اور شہریوں کا حق ہے۔ 2014 میں اسلام آباد میں پی ٹی آئی کے دھرنے کا حوالہ دے کر انہوں نے کہا کہ اس وقت بھی جب دھرنے کے آخری دن تھے تو بھی ان کو زبردستی نہیں اٹھایا۔

چوہدری نثار نے کہا کہ اب اعلان کیا گیا ہے کہ اسلام آباد کو بند کریں گے،دھرنا دینے والوں کا اس مرتبہ پاک سیکرٹریٹ میں گھسنے کا منصوبہ ہے۔ پاکستان ایک ایٹمی ملک ہے، ایٹمی ملک ہونے کی وجہ سے اس کی دشمن پر ایک رعب ہے، دارالحکومت بند ہونے سے یہ بات ہو گی کہ یہ کیسا ملک ہے کہ ایک جھتہ آتا ہے اور زور زبردستی سے دارالحکومت کو بند کروا دیا جاتا ہے، اس سے حکومت کی نہیں ملک کی بند نامی ہوگی۔

(جاری ہے)

ان کا مزید کہنا تھا کہ شہر کو لاک ڈاؤن کرنے کااعلان ریاست کے خلاف جرم ہے۔ چوہدری نثار نے بتایا کہ پولیس پاکستان مسلم لیگ (ن) کی نہیں ہے، یہ ریاست کی فورس ہے، اس نے ہی حکومت کی عمل داری قائم کی ہے، آئندہ بھی اسی طرح ہوگا۔ انہوں نے کہا کہ وہ عمران خان کی بہت سی خوبیوں سے واقف ہیں۔ عمران خان کو مخاطب کرکے انہوں نے کہا کہ یہ جو بیج بوئے جا رہے ہیں اس سے وفاقی کی بنیادیں ہل جائیں گی، ایک صوبے کو وفاق کے خلاف کھڑا کیا جا رہا ہے، 10،15ہزار کاجتھہ دارالحکومت پرقبضہ کرکے اپنی بات نہیں منواسکتا، کیا کوئی صوبائی حکومت وفاق کے خلاف اعلان جنگ کرسکتی ہے۔