من گھڑت واقعات سے مسئلہ کشمیرسے عالمی توجہ نہیں ہٹائی جاسکتی٬ سربراہ پاک بحریہ

کاکول (اُردو پوائنٹ اخبارتازہ ترین - آئی این پی۔ 15 اکتوبر2016ء) پاک بحریہ کے سربراہ ایڈمرل ذکااللہ نے کہا ہے کہ پاکستان امن پسند ملک ہے اور بھارت سمیت تمام پڑوسی ممالک سے خوشگوار تعلقات کا خواہاں ہے٬ مقبوضہ کشمیر میں بھارتی بربریت جاری ہے٬ من گھڑت واقعات سے مسئلہ کشمیرسے عالمی توجہ نہیں ہٹائی جاسکتی٬ اگر کسی دشمن کی جانب سے جارحیت کی کوشش کی گئی تو ملکی سالمیت اورخودمختاری کا ہرقیمت پردفاع اور پوری طاقت سے ملکی سرحدوں کی حفاظت کریں گے٬ سیکیورٹی فورسز موجودہ حالات کے چیلنجزسے خوش اسلوبی سے نمٹ رہی ہے٬ملک سے دہشت گردی اور انتہا پسندی کاخاتمہ کریں گے٬ آپریشن ضرب عضب اور نیشنل ایکشن پلان قوم کے عزم کا مظہر ہے٬ آپریشن ضرب عضب تکمیل کے مراحل میں ہے۔

وہ پاکستان ملٹری اکیڈمی کاکول میں 35 ویں گریجویٹ کورس کی پاسنگ آؤٹ پریڈ تقریب سے خطاب کررہے تھے ۔

(جاری ہے)

35ویں پی ایم اے گریجویٹ کورس کی پاسنگ آئوٹ پریڈ کی تقریب کاکول اکیڈمی میں منعقد ہوئی۔پاس آئوٹ ہونے والے 26کیڈٹس کا تعلق سعودی عرب اور لیبیا سے تھا۔ایڈمرل ذکا اللہ نے بہترین کارکردگی کے حامل کیڈٹس میں اعزازات تقسیم کئے اورچیف آف نیول سٹاف ایڈمرل ذکا اللہ تقریب کے مہمان خصوصی تھے ۔

ایڈمرل ذکا اللہ نے تقریب سے خطاب کرتے ہوئے کہا کہ پاک فوج کی شاندار تقریب میں شرکت سے انتہائی خوشی محسوس کی٬ تقریب پاک فوج کی شاندار روایات کی عکاس ہے۔نیول چیف نے کہا کہ پاس آئوٹ ہونے والے کیڈٹس کو مبارکباد پیش کرتا ہوں اور کیڈٹس کی شاندار کارکردگی ان کے والدین اور انسٹرکٹرز کیلئے باعث فخر ہے٬دوست ممالک کے کیڈٹس کی شمولیت بھی ہمارے لئے اعزاز کی بات ہے۔

انہوں نے کہا کہ کیڈٹس پر وطن دفاع کی مقدس ذمہ داری عائد ہے اور پاک فوج کا شمار دنیا کی بہترین افواج میں ہوتا ہے٬پاکستان کی تاریخ سیکیورٹی فورسز کے کارناموں اور قربانیوں سے بھری پڑی ہے ۔نیول چیف نے کہا کہ سکیورٹی فورسز چیلنجز سے خوش اسلوبی سے نمٹ رہی ہیں۔آپریشن ضرب عضب اور نیشنل ایکشن پلان قوم کے عزم کا مظہر ہیں ٬آپریشن ضرب عضب تکمیل کے مراحل میں ہے اور ملک سے دہشتگردی اور انتہاپسندی کا خاتمہ کرکے دم لیں گے٬مقبوضہ کشمیر میں بھارتی بربریت جاری ہے٬بھارت کی جھوٹی کہانیوں اور من گھڑت واقعات سے مسئلہ کشمیر سے عالمی توجہ نہیں ہٹائی جاسکتی۔

انہوں نے کہا کہ پاکستان امن پسند ملک ہے اور ہمسائیوں سے خوشگوار تعلقات کے خواہاں ہیں۔ایڈمرل ذکاء اللہ نے کہا کہ جارحیت کی صورت میں ملکی خودمختاری اور سالمیت کا ہرقیمت پر دفاع کریں گے٬ہم اپنی پوری طاقت سے ملکی سرحدوں کی حفاظت کریں گے٬کشیدہ صورتحال میں پاس آئوٹ ہونے والے کیڈٹس پر بھاری ذمہ داری عائد ہوتی ہے٬توقع ہے پاس آئوٹ ہونے والے کیڈٹس معیار کو برقرار رکھیں گے۔(خ م)