اسلام کی آئیڈیالوجی علم٬امن اور رواداری پر استوار ہی: ڈاکٹر حسن محی الدین

لاہور(اُردو پوائنٹ اخبارتازہ ترین - آن لائن۔ 13 اکتوبر2016ء) تحریک منہا ج القرآن انٹر نیشنل کی سپریم کونسل کے چیئر مین ڈاکٹر حسن محی الدین نے آسٹریلیا ملبورن میں ’’ تھرڈ آسٹریلین کانفرنس آن اسلام‘‘ کے شرکاء کو لیکچر دیتے ہوئے کہاکہ اسلام کی آئیڈیالوجی علم٬امن ٬رواداری٬برداشت پر استوار ہے ٬اسلام میں دہشتگردی اور انتہا پسندی کی کوئی جگہ نہیں ہے ٬صرف اسلام ہی نہیں دنیا کے کسی مذہب میں بے گناہ کی جان لینے کی اجازت نہیں دہشتگردی کو مذہب اور سیاست کا حصہ بنانے کی منفی کوششوں کے باعث دہشتگرد گروپس کو مذموم مقاصد کی تکمیل میں مدد ملی ۔

کانفرنس میںآسٹریلیا کی ممتاز علمی ٬مذہبی شخصیات اور سول سوسائٹی کے افراد نے شرکت کی ۔ڈاکٹر حسن محی الدین ملبورن کانفرنس میں شرکت کیلئے دو ہفتے کے دورہ پر آسٹریلیامیں ہیں ۔

(جاری ہے)

وہ اپنے قیام کے دوران مزید کانفرنسز سے خطاب کے ساتھ ساتھ منہاج القرآن اسلامک سنٹر آسٹریلیامیں منعقدہ پیس کانفرنس سے بھی خطاب کریں گے ۔ڈاکٹر حسن محی الدین نے تھرڈ آسٹریلین کانفرنس آن اسلام سے خطاب کرتے ہوئے کہاکہ داعش کے فتنے اور غارت گری سے متعلق 14سوسال قبل پیغمبر امن و سلامتی نے آگاہ کر دیا تھاانکی غارت گری کے طریقہ کار اور شکل و صورت سے متعلق بھی بتا دیا تھا ۔

داعش یا القاعدہ کو اسلام سے جوڑنا کسی صورت درست نہیں ہے ٬ایسی سوچ کا تعلق غلط فہمی٬جہالت یا تعصب پر مبنی ہے ۔آج دنیا جسے داعش کے نام سے جانتی ہے اسلام نے اسے خارجیز کا نام دیا ۔یہ خارجی دنیا میں اپنے مفادات کیلئے فساد پھیلاتے ہیں ٬بے گناہوں کی جانیں لیتے ہیں اور خون خرابا کرتے ہیں ۔اسلام وہ ضابطہ حیات ہے امن جسکی تعلیمات کا مضبوط ستون ہے ۔

قرآن نے ایک بے گناہ کی موت کو پوری انسانیت کی موت قرار دیا ہے اور ایک زندگی بچانے کو پوری انسانیت بچانے سے منسوب کیا ہے ٬لہذا ایک ایسا دین جو تہذیب و شائستگی اور انسانیت کی بقا کا درس دیتا ہو وہ کسی بے گناہ کی جان لینے پر کیسے اکسا سکتا ہے۔انہوں نے اپنے لیکچر کے اختتام پر کہاکہ دہشتگردی اور انتہا پسندی کی عالمی برائی کے خاتمے کیلئے اقوام متحدہ کی سطح پر ایک Peace Narrative تیار ہونا چاہیے اور حکومتوں کی سطح سے اس پر عملدرآمد یقینی بنایا جا نا چاہیے ٬ڈاکٹر حسن محی الدین نے کہاکہ ڈاکٹر محمد طاہر القادری عالم اسلام کی واحد شخصیت ہیں جنہوں نے دہشتگردی اور خود کش دھماکوں کے خلاف عالمگیر فتویٰ دیا اور دہشتگردی کا Counter Narrativeدیا ٬فروغ امن کے حوالے سے تحریک منہاج القرآن کی طرف سے ڈاکٹر طاہر القادری کی سر پرستی میں 25کتابیں شائع ہو چکی ہیں ٬جن میں بیشتر انگریزی اور عربی زبان میں ہیں ۔

انہوں نے کہا کہ ڈاکٹر طاہر القادری کو یہ اعزاز حاصل ہے کہ انہوں نے فتنہ خوارج کے خلاف 600 صفحات پر مشتمل تاریخی ڈاکومنٹ جاری کیا ٬جس کے Content اور حوالہ جات کو دنیا بھر میں پذیرائی مل رہی ہے اور یہ انسانیت کی ایک عظیم خدمت ہے ۔