بھارت میں 200 سے زائد دلتوں نے انتہا پسندوں کے مظالم سے تنگ آکربدھ مت قبول کر لیا

ہندو دھرم میں ہمیشہ نسلی تعصب اور نفرت کا سامنا کرنا پڑا٬ہمارے بچوں کو تعلیم سے محروم رکھا گیا ٬ سرکاری ملازمتوں کے دروازے بھی بند کر دئیے گئے٬مذہب بدلنے والے دلتوں کا شکوہ

جمعرات 13 اکتوبر 2016 11:10

احمد آباد (اُردو پوائنٹ اخبارتازہ ترین - آئی این پی۔ 13 اکتوبر2016ء) بھارت میں نچلی ذات کے ہندوؤں نے انتہا پسندوں کے مظالم سے تنگ آکر مذہب تبدیل کرنا شروع کر دیا٬ گجرات میں سینکڑوں دلتوں نے بدھ مت قبول کر لیا۔بھارتی میڈیا کے مطابق ریاست گجرات میں انتہا پسندوں کے ظلم و ستم سے تنگ 200 سے زائد دلتوں نے بدھ مت قبول کر لیا۔

(جاری ہے)

ضلع احمد آباد میں منعقدہ تقریب میں بدھ مت قبول کرنیوالے دلتوں نے ہندو انتہا پسندوں کیخلاف دل کی خوب بھڑاس نکالی۔

انھوں نے کہا کہ ہندو دھرم میں انھیں ہمیشہ نسلی تعصب اور نفرت کا سامنا کرنا پڑا۔ ان کے بچوں کو تعلیم سے محروم رکھا گیا جبکہ سرکاری ملازمتوں کے دروازے بھی ان پر بند کر دئیے گئے۔ آئندہ چند روز میں مزید کئی سو دلتوں کی جانب سے ہندو دھرم چھوڑ کر بدھ مت قبول کرنے کا امکان ہے۔ بھارت میں انتہا پسند مودی سرکار کی آمد کے بعد سے مسلمانوں٬ سکھوں اورعیسائیوں سمیت سب اقلیتوں کی زندگی اجیرن ہو چکی ہے۔