عوام اپنی صفوں میں تحمل وبرداشت٬ رواداری اور بھائی چارے کے ماحول کو برقرار رکھیں ..
تازہ ترین : 1

عوام اپنی صفوں میں تحمل وبرداشت٬ رواداری اور بھائی چارے کے ماحول کو برقرار رکھیں ٬اقبال ظفرجھگڑا

شہدائے کربلا نے ظلم ٬ باطل کیخلاف آخری حدتک لڑنے کا پیغام دیا تو دوسری جانب حق اور سچ کی بالادستی قائم رکھنے کا سلیقہ بھی بتادیا٬یوم عاشورہ پر پیغام

پشاور(اُردو پوائنٹ اخبارتازہ ترین۔ 11 اکتوبر2016ء)گورنرخیبرپختونخوا انجینئراقبال ظفرجھگڑا نے تمام ہم وطنوں سے اپیل کی ہے کہ وہ اپنی صفوں میں تحمل وبرداشت٬ رواداری اور بھائی چارے کے ماحول کو برقرار رکھیں اوروقت کاتقاضا ہے کہ باہمی احترام اورمکمل اتحاد واتفاق کاماحول یقینی بنایاجائے۔ ان خیالات کا اظہارانہوں نے محرم الحرام کے موقع پر اپنے ایک پیغام میں کیاہے۔

گورنرکے پیغام کا مکمل متن کے مطابق یوم عاشور دسویں محرالحرام ہے۔ اسلامی تاریخ کے اس مقدس موقع پر آج کے دن کو حق اور سچائی کی سربلندی کیلئے حضرت امام حسین رضی اللہ عنہ اور ان کے جانثار ساتھیوں کی عظیم قربانیوں کی یاد میں منایاجاتاہے ۔تاریخی حقائق اس امر کے گواہ ہیں کہ ظلم وبربریت کے خلاف مثالی جرائت وجذبے کے اظہار کے حوالے سے یہ د ن ایک جامع پیغام کاحامل ہے۔

درحقیقت شہدائے کربلا نے جس مثالی جذبے اورحوصلے کامظاہرہ کیا اس سے ہر مسلمان کیلئے ثابت قدمی٬ برداشت٬ صبر اور وفا کا ایک جامع پیغام ملتاہے۔ ایک طرف شہدائے کربلا نے ظلم اورباطل کے خلاف آخری حدتک لڑنے کا پیغام دیا تو دوسری جانب حق اور سچ کی بالادستی قائم رکھنے کا سلیقہ بھی بتادیا۔ اس اہم موقع پر میری تمام ہم وطنوں بالعموم اور خیبر پختونخوا اور فاٹا کے عوام سے باالخصوص اپیل ہے کہ وہ اپنی صفوں میں برداشت٬ رواداری اور بھائی چارے کے ماحول کو برقرار رکھیں۔

یہ دن ہمیں اتحاد٬ بھائی چارے اور اخوت کے جذبے کو برقراررکھنے کا درس دیتا ہے۔ حالیہ برسوں میں ہم جن حالات سے گزرے ہیں ان کے پیش نظر ہمیں روزمرہ حالات کاسامنا کرتے ہوئے ثابت قدم رہنے کی ضرورت ہے اوریہی یوم عاشورکے شہداء کو خراج عقیدت پیش کرنے کا عمدہ انداز بھی ہوسکتاہے۔
وقت اشاعت : 11/10/2016 - 16:51:31

اس خبر پر آپ کی رائے‎