کاشتکار و زمیندار ان کیلئے ادارہ ”ٹیوٹا“ کی مدد سے تربیتی کورسز کرائے جائیں گے‘صوبائی وزیر کو آپریٹو ملک محمد اقبال چنڑ

لاہور ( اُردو پوائنٹ اخبارتازہ ترین - این این آئی۔۔05 اکتوبر۔2016ء) صوبائی وزیر کو آپریٹو ملک محمد اقبال چنڑ نے کہا ہے کہ زراعت کو جدید خطوط پر استوار کر کے زرعی پیداوار میں اضافہ کر نے اور زمینداروکاشتکاروں کے مسائل فوری حل کر نے کیلئے تمام وسائل بروئے کار لائے جائیں گے۔وہ اپنے دفتر کے کمیٹی روم میں ڈویژنل ایگریکلچرل ایڈوائزری کمیٹی کے اجلاس سے خطاب کر رہے تھے۔

انہوں نے کہا کہ زراعت کو مستحکم کر کے اور کاشتکاری کی فلاح و بہبود اور انہیں جدید زرعی ٹیکنالوجی سے روشناس کر انے کیلئے اقدامات کئے جائیں۔ انہوں نے کہا کہ ڈویژنل زرعی مشاورتی کمیٹی کے فورم کو فعال اور اس میں پیش کی جانے والی تجاویز پر عملدرآمد کرایا جائے گا۔ انہوں نے کہا کہ نہری پانی کی چوری کی روک تھام کیلئے موثر انداز میں کام کیا جائے ۔

(جاری ہے)

انہوں نے کہا کہ زمیندار و کاشتکاران کو حکومت کی جانب سے دی جانے والی سہولیات کے حوالہ سے آگاہ کیا جائے تاکہ زیادہ سے زیادہ کاشتکار استفادہ کر سکیں۔ انہوں نے کہا کہ حکومت کی جانب سے مختلف فصلات کی کاشت اور پیداوار کے حوالہ سے دیئے جانے والے اہداف کو حاصل کر نے کیلئے اقدامات کئے جائیں ۔ انہوں نے کہا کہ زراعت کے شعبہ میں جاری ترقیاتی پراجیکٹس کو بروقت مکمل کیا جائے۔

انہوں نے کہا کہ زراعت کے شعبہ کے مختلف پروگراموں کے حوالہ سے کاشتکار و زمیندار ان کیلئے ادارہ ”ٹیوٹا“ کی مدد سے تربیتی کورسز کرائے جائیں گے تاکہ زرعی ماہرین کی تربیت اور تعلیم سے اس شعبہ سے وابستہ افراد کی استعداد کار میں اضافہ ممکن ہو سکے۔ انہوں نے بتا یا کہ وزیر اعلیٰ پنجاب کے پروگرام برائے مشینی کاشت کے فروغ کے سلسلہ میں گندم کے بیماریوں سے محفوظ بیج کی مفت فراہمی ، سبزیوں کی کاشت، مونگ اور مسورکی دالوں کی کاشت کیلئے حکومت 33فیصدنرخ پر بیج دے رہی ہے۔

آم کے باغات میں فروٹ فلائی پر قابو پانے کیلئے بایولوجیکل طریقہ کا ر استعمال اور متوازن کھادوں کے استعمال کے فروغ کیلئے اقدامات کئے جارہے ہیں۔ انہوں نے بتایا کہ نہری کھالہ جات کو پختہ بنانے اور لیزر لیولنگ یونٹ کی فراہمی جیسے گرا نقدر اقدامات کئے گئے ہیں۔ اسی طرح کاشتکاروں کو بذریعہ قرعہ اندازی زرعی آلات جس میں روٹا ویٹر ، ڈسک ہیرو، چیزل ہل، ربی ڈرل شامل ہیں ۔

انہوں نے کپاس، گنا اور گندم کی فصل کاشت اور پیداوار کے بارے میں تفصیلات سے آگاہ کیا۔ اجلاس میں ایکسئین انہار ہیڈ کوارٹر نے بتایا کہ ربیع اورخریف کی فصلوں کیلئے نہری پانی فراہم کیا جارہا ہے اور محکمہ انہار کے ترقیاتی پراجیکٹ پر کام جاری ہے۔ انہوں نے بتایا کہ نہری پانی چوری کی روک تھام کیلئے انہار افسران فیلڈ میں کام کر رہے ہیں ۔