چوڑیاں پہننے والے اور مہندی لگانے والے ہاتھ اپنے وطن کے دفاع کے لئے اسلحہ بھی اٹھا سکتے ہیں‘ رابی پیرزادہ

لاہور ( اُردو پوائنٹ اخبارتازہ ترین - این این آئی۔30 ستمبر۔2016ء) خوبرو اداکارہ رابی پیرزادہ نے کہا ہے کہ چوڑیاں پہننے والے اور مہندی لگانے والے ہاتھ اپنے وطن کے دفاع کے لئے اسلحہ بھی اٹھا سکتے ہیں ،خدا نخواستہ اگر پاک بھارت جنگ شروع ہوئی تو میں اپنے فوجی بھائیوں کے ساتھ اگلے مورچوں میں شہادت کا رتبہ حاصل کرنے کیلئے بے قرار ہوں ۔ خصوصی گفتگو کرتے ہوئے انہوں نے کہا کہ میرے اندر فوجی خون موجودہے ، میرے دادا ، پردادا فوج میں رہے اور اسی وجہ سے میرے اندر بھی وہ فوجی جذبہ موجود ہے ۔

(جاری ہے)

میں اسلحہ چلا سکتی ہوں اور رضاکارانہ طورپر پاک فوج میں خدمات انجام دینا چاہتی ہوں ۔خدانخوستہ اگر جنگ کی صورتحال ہوئی تو اپنے وطن کے دفاع کے لئے مجھے اگلے مورچوں پر بھیجا جائے ۔ رابی پیرزادہ نے کہا کہ میرے ہی احساسات اور جذبات نہیں بلکہ پوری قوم کی خواتین اور یہاں کے بچے بچے کے یہی ارادے ہیں ۔ انہوں نے کہاکہ عالمی دنیا اور خاص طور پر اقوام متحدہ کو بھارتی جنگی عزائم کے حوالے سے نوٹس لینا چاہیے جو بغیر کسی اشتعال کے پاکستانی علاقوں پر گولہ باری کر رہا ہے جس سے ہمارے دو جوان شہید ہو چکے ہیں ۔