کراچی میں طویل عرصے بعد لائیو کنسرٹ کا رجحان فروغ پانے لگا

کراچی (اُردو پوائنٹ اخبارتازہ ترین - این این آئی۔28 ستمبر۔2016ء) کراچی میں ایک طویل عرصے بعد لائیو میوزک کنسرٹ کا رجحان فروغ پانے لگا ۔ گزشتہ ہفتے بیک وقت گلوکار شہزاد رائے ، عابدہ پروین ، اسرار ، کومل رضوی ، فیوڑن و دیگر گلوکاروں کے مختلف مقامات پر لائیو میوزک کنسرٹس منعقد کئے گئے جس میں ہزاروں فیملیز اور نوجوانوں نے شرکت کی جو ان کی گائیکی سے لطف اندوز ہوتے رہے ۔

(جاری ہے)

کراچی آرٹس کونسل میں گلوکار شہزاد رائے نے ہزاروں لڑکے اور لڑکیوں کے سامنے لائیو گیت سنا کر سماں باندھ دیا ۔ فوک گلوکارہ عابدہ پروین اور پاپ و فوک گلوکار اسرار نے ساحلی کلب میں رات گئے تک فوک ، پاپ اور صوفیانہ کلام سنا کر میلہ لوٹ لیا ۔ کومل رضوی نے تاریخی ورثہ فریئر ہال (باغ جناح ) میں کنسرٹ میں رات گئے تک پرفارم کیا جس میں ان کے ہمراہ دیگر گلوکاروں نے بھی اپنی گائیکی کا رنگ جمایا ۔ شہر میں بہتر ہوتے ہوئے حالات کو شہریوں نے ثقافتی سرگرمیوں کیلئے خوش آئند قرار دیا ہے ۔ ان کا کہنا ہے کہ اب ہمیں سکون کیساتھ میوزک ، گیتوں اور ثقافتی تقریبات میں جاکر لطف آنے لگا ہے ۔