پاکستان میں دہشتگردی متحدہ قائد نے شروع کی، برطانوی شہری 20سالوں سے ٹارگٹ کلنگ کروا رہا ہے ایکشن کیوں نہیں لیتے؟‘ عمران خان

اسلام آباد(اُردو پوائنٹ اخبارتازہ ترین - این این آئی۔23 اگست ۔2016ء) پاکستان تحریک انصاف کے چیئرمین عمران خان نے کہا ہے کہ پاکستان میں دہشت گردی متحدہ قائد نے شروع کی، برطانوی شہری 20سالوں سے ٹارگٹ کلنگ کروا رہا ہے ایکشن کیوں نہیں لیتے؟،متحدہ قائد نے جو زبان استعمال کی دنیا کی کسی جمہوریت میں ایسا نہیں ہو سکتا،نریندر مودی نے بھی ایسی زبان استعمال نہیں کی تھی،میڈیا کو ڈرانے کے لیے دہشت پھیلائی گئی، حکومت کو ایم کیو ایم اور مسلح ونگز کیخلاف بھی کارروائی کرنی چاہیے۔

ان خیالات کا اظہار انہوں نے گزشتہ روز اسلام آباد میں میڈیا سے گفتگو کرتے ہوئے کیا ۔ عمران خان نے کہا کہ گزشتہ روز متحدہ قائد نے جو زبان استعمال کی دنیا کی کسی جمہوریت میں ایسا نہیں ہو سکتا۔

(جاری ہے)

نریندر مودی نے بھی ایسی زبان استعمال نہیں کی تھی۔ معافی تب مانگے جب ایک دفعہ ایسا بولا گیا ہو۔ متحدہ قائد کی پوری ایک تاریخ ہے۔ متحدہ قائد نے بھارت کی زمین پر پاکستان کیخلاف باتیں کیں۔

بھارت میں متحدہ قائد کو دعوت نامہ را کے کہنے پر دیا گیا تھا۔ برطانوی حکومت نے یقین دہانی کروائی گئی تھی لیکن ایکشن نہیں لیا گیا۔ برطانوی شہری 20سالوں سے ٹارگٹ کلنگ کروا رہا ہے ایکشن کیوں نہیں لیتے؟۔انہوں نے کہا کہ کراچی 80کی دہائی میں تیزی سے ترقی کر رہا تھا۔ روشنیوں کے شہر کی تباہی متحدہ قائد نے کی۔ نصیر اﷲ بابر کے آپریشن کے بعد پولیس والوں کو بھی چن چن کر مارا گیا۔

انہوں نے کہا کہ کل میڈیا دفاتر پر حملہ کیا گیا کونسا ملک یہ برداشت کر سکتا ہے کہ بیرون ملک بیٹھ کر کوئی ایسے واقعات کروائے۔ دہشت گردی تو پاکستان میں متحدہ قائد نے شروع کی۔ مہاجروں کے بچے ایسے نہیں وہ پاکستان سے پیار کرتے ہیں۔ عمران خان نے مطالبہ کیا کہ کراچی کی تباہی میں ایم کیو ایم قائد کا ہاتھ ہے ان کے خلاف حکومت کو سخت کاروائی کرنی چاہیے ہے اور ایم کیو ایم کے مسلح ونگز کیخلاف بھی کارروائی کرنی چاہیے۔

ایم کیو ایم میں ہر کوئی دہشت گرد نہیں صرف مسلح ونگز کیخلاف ایکشن چاہتے ہیں۔ میڈیا کو ڈرانے کے لیے کل دہشت پھیلائی گئی۔عمران خان نے پاناما لیکس کے معاملے پر بات کرتے ہوئے کہا کہ پاناما لیکس کیخلاف ایکشن نہ لینے پر خیبرپختونخوا میں قرارداد پاس کریں گے اس کے بعد سپریم کورٹ بھی جائیں گے۔ 3ستمبر کو عوام کا سمندر لاہور آ رہا ہے۔ عمران خان نے کہا کہ میرے پاس کوئی عہدہ نہیں مجھے الیکشن کمیشن جانے سے کیوں روک رہی ہے۔ میرے جہلم جانے کیوجہ سے الیکشن کمیشن نے پابندی لگائی ۔