کپاس پاکستان کی ایک انتہائی اہم فصل ہے ملکی زرمبادلہ میں 60 فیصد حصہ رکھتی ہے‘ترجمان محکمہ زراعت

بدھ 17 اگست 2016 20:33

لاہور(اُردو پوائنٹ اخبارتازہ ترین - این این آئی۔17 اگست ۔2016ء ) کپاس پاکستان کی ایک انتہائی اہم فصل ہے جو کہ ملکی زرمبادلہ میں 60 فیصد حصہ رکھتی ہے،موسمی حالات سازگار ہونے کے باعث کپاس کی فصل کی مجموعی صورتحال تسلی بخش ہے اور حکومت پنجاب کی ہدایت پر محکمہ زراعت کے مقامی ماہرین فصل کی بہتر دیکھ بھال اور کاشتکاروں کی رہنمائی کے لیے فیلڈ میں موجود ہیں، محکمہ زراعت پنجاب کے شعبہ پیسٹ وارننگ ساہیوال ڈویژن کی مختلف ٹیموں نے گذشتہ روزساہیوال ، اوکاڑہ اور پاکپتن کے اضلاع میں 49مقامات پرکپاس کی فصل کا معائنہ کیا اورمحکمہ کی طرف سے جاری کردہ پیسٹ سکاؤٹنگ رپورٹ کے مطابق چست تیلہ کے 13،سفید مکھی کے8، تھرپس کاایک ،ملی بگ کے 8، گلابی سنڈی کے20اور کپاس کی پتہ مروڑ وائرس کے19 ہاٹ سپاٹ مشاہدہ میں آئے ہیں ۔

(جاری ہے)

محکمہ زراعت پنجاب کے ترجمان نے ساہیوال ڈویژن کے اضلاع کے کاشتکار وں کو ہدایت کی ہے کہ وہ رس چوسنے والے کیڑوں اور گلابی سنڈی کے حملہ سے بچانے کے لیے فصلکی ہفتہ میں دو بار پیسٹ سکاؤٹنگ کریں ،فصل پر چست تیلہ ،سفید مکھی ، تھرپس ،ملی بگ اور گلابی سنڈی کا حملہ معاشی نقصان کی حد تک ہونے کی صورت میں محکمہ زراعت پنجاب کے مقامی زرعی ماہرین کے مشورہ سے نئی کیمسٹری کی حامل زہروں کا سپرے کریں۔

بارشوں کے بعد زمین وتر آنے پر کپاس کے کھیتوں میں اگنے والی جڑی بوٹیوں کی تلفی کو یقینی بنائیں اور کپاس کی پتہ مروڑ وائرس کے حملہ کی صورت میں دلبرداشتہ ہونے کی بجائے رس چوسنے والے کیڑوں کے بروقت انسداد کو یقینی بنائیں اورفصل میں نائٹروجنی کھادوں کے استعمال کے علاوہ واجزائے صغیرہ زنک ، بوران اور میگنیشیم کے ہفتہ یا عشرہ کے وقفہ سے 3سے 4سپرے کریں۔