میزان بینک اور یاماہا موٹر پاکستان کے درمیان معاہدہ۔میزان بینک یاماہا موٹر سائیکلز ..
تازہ ترین : 1

میزان بینک اور یاماہا موٹر پاکستان کے درمیان معاہدہ۔میزان بینک یاماہا موٹر سائیکلز کے تمام ماڈلز کو فنانسنگ فراہم کرے گا

کراچی(اُردو پوائنٹ اخبارتازہ ترین۔10 اگست ۔2016ء) میزان بینک نے یاماہا موٹر پاکستان کے ساتھ ایک معاہدے پر دستخط کر دیئے ہیں۔ اس معاہدے کے تحت میزان بینک یاماہا موٹر سائیکلز کے تمام ماڈلز کو فنانسنگ فراہم کرے گا۔ میزان بینک یہ فنانسنگ حال ہی میں متعارف کرائی جانے والی شرعی اصولوں کے مطابق بائیک اجارہ پراڈکٹ کے تحت فراہم کرے گا۔ معاہدے پر میزان بینک کے ڈپٹی چیف ایگزیکٹو آفیسر عارف الاسلام اور یاماہا موٹر پاکستان کے منیجنگ ڈائریکٹر اتو یاشوشی نے دستخط کئے۔

اس موقع پر میزان بینک کے ڈپٹی چیف ایگزیکٹو آفیسر عارف الاسلام نے کہا کہ میزان بینک کنزیومر فنانسنگ پر زیادہ فوکس کر رہا ہے اور بینک اس وقت کار، جنریٹرز، لیپ ٹاپس، ہاؤسنگ فنانس اور مختلف پراڈکٹس پر فنانسنگ فراہم کررہا ہے۔ انہوں نے کہاکہ میزان بینک نے اس سال بائیک اجارہ پراڈکٹ متعارف کرائی ہے اور ہمیں مارکیٹ سے بہت شاندار رسپانس ملا ہے۔

یاماہا موٹر سائیکل کے ساتھ معاہدے سے موٹر سائیکلوں کی رینج میں ایک اچھا اضافہ ہے جس سے صارفین اب میزان بینک سے یاماہا موٹر سائیکلز بھی حاصل کر سکتے ہیں۔ اس موقع پر یاماہا موٹر پاکستان کے منیجنگ ڈائریکٹر اتو یاشوشی نے کہاکہ اسلامک فنانس کی آگاہی سے اسلامک کنزیومر فنانس پراڈکٹس کی ڈیمانڈ میں اضافہ ہورہا ہے اور اس معاہدے سے میزان بینک اور یاماہا موٹر سائیکلز موثر طریقے سے صارفین کی ضروریات کو پورا کرتے ہوئے مارکیٹ پوٹینشل سے فائدہ اٹھا سکیں گے۔ انہوں نے کہاکہ میزان بینک کے ساتھ معاہدے سے یاماہا صارفین کو میزان بائیک اجارہ کی سہولت بھی فراہم ہو گی۔

وقت اشاعت : 10/08/2016 - 22:11:48

متعلقہ عنوان :

اپنی رائے کا اظہار کریں