کپاس کی چنائی ہمیشہ پودے کے نچلے حصے سے پکے ہوئے ٹینڈوں سے شروع کریں،ڈاکٹر صغیر ..
تازہ ترین : 1

کپاس کی چنائی ہمیشہ پودے کے نچلے حصے سے پکے ہوئے ٹینڈوں سے شروع کریں،ڈاکٹر صغیر احمد

فیصل آباد۔10 اگست(اُردو پوائنٹ اخبارتازہ ترین۔10 اگست۔2016ء)ڈاکٹر صغیر احمد ڈائریکٹر کپاس ایوب زرعی تحقیقاتی ادارہ فیصل آباد نے کاشتکاروں کو ہدایت کی ہے کہ وہ کپاس کی چنائی اس وقت شروع کریں جب 50فیصد سے زیادہ ٹینڈ ے کھل جائیں تاکہ اعلیٰ معیار کی کپاس حاصل ہوسکے ۔ انہوں نے بتایا کہ کپاس کی چنائی صبح 10بجے شروع کریں تاکہ کھلے ہوئے ٹینڈوں کی روئی میں شبنم کی وجہ سے نمی باقی نہ رہے ۔

انہوں نے کہاکپاس کی چنائی ہمیشہ پودے کے نچلے حصے سے پکے ہوئے ٹینڈوں سے شروع کریں اور اوپر کو چنائی کرتے جائیں۔ چنائی کے دوران چنی ہوئی پھٹی کو صاف اور خشک سوتی کپڑے پر رکھیں تاکہ پھٹی آلودگی سے محفوظ رہ سکے۔ انہوں نے کہا کہ کاشتکار کپاس کی چنائی کا درمیانی وقفہ کم ازکم پندرہ سے بیس دن رکھیں ۔ جلدی چنائی کرنے سے ریشہ کچا رہ جاتا ہے ۔

پھٹی کو بوریوں میں بھرنے سے پہلے ناکارہ اور نیم پختہ ٹینڈوں کو نکال دیں اور چنی ہوئی کپاس میں نمی کچے ٹینڈے ، ٹینڈوں کے ٹکڑے ، رسیاں ، سوتلی اور بال وغیرہ ہرگز شامل نہ ہونے دیں ورنہ پھٹی کا معیار گر جائے گا جس سے منڈی میں کم قیمت حاصل ہوگی اور اس سے بننے والے دھاگے اور کپڑے کا معیار بھی بہتر نہیں ہوگا۔ کپاس کی مختلف اقسام کو چنائی کے بعد علیحدہ رکھیں اور کپاس کو زیادہ دیر تک سٹور نہ کریں کیونکہ اس سے کپاس کی کوالٹی متاثر ہوتی ہے ۔
وقت اشاعت : 10/08/2016 - 16:24:39

اپنی رائے کا اظہار کریں