کوئٹہ دھماکہ ہمارے دشمن کی بزدلانہ شیطانی حرکت ہے‘حافظ محمد ادریس
تازہ ترین : 1

کوئٹہ دھماکہ ہمارے دشمن کی بزدلانہ شیطانی حرکت ہے‘حافظ محمد ادریس

لاہور ( اُردو پوائنٹ اخبارتازہ ترین۔9 اگست ۔2016ء) نائب امیر جماعت اسلامی پاکستان حافظ محمد ادریس نے کہا ہے کہ کوئٹہ کا دھماکہ ہمارے دشمن کی بزدلانہ شیطانی حرکت ہے ، اب یہ پاکستان کے سیکورٹی اداروں اور حکومت کا امتحان ہے کہ وہ دشمن کے اس خونخوار چہرے کو عالمی برادری کے سامنے کس طرح بے نقاب کرتے ہیں۔ منصورہ میں کارکنان کی تربیتی ورکشاپ کے اختتامی سیشن سے خطاب کرتے ہوئے انہوں نے کہاکہ پاکستان ایک عظیم نعمت اور اسلام کا قلعہ ہے ۔

اسلام دشمن ، پاکستان مخالف قوتیں اس کو منہدم کر نا چاہتی ہیں ۔پاکستان کی حفاظت اللہ کر رہا ہے اور پاکستان کے محبت وطن و محب اسلام تمام شہری بھی اس کا دفاع کرنے کے لیے ہر قربانی دینے کو تیار ہیں ۔ انہوں نے کہاکہ ہمارا دشمن انشاء اللہ ناکام ہوگا اور پاکستان اپنے مقاصد کے حصول کی طرف بڑھتا رہے گا ۔ ہماری منزل اسلامی پاکستان اور خوش حال پاکستان ہے ۔

حافظ محمد ادریس نے کہاکہ ہمیں اپنے دشمنوں کوشکست دینے کے لیے اپنے ملک کے نظام سے کرپشن ، اقرباپروری اور قرضے معاف کرانے کی مجرمانہ حرکتوں کا سدباب کرناہوگا۔ انہوں نے کہاکہ پاک چائنہ کوری ڈور پاکستان چین اور پورے خطے کے دیگر ممالک کے لیے خوشحالی کے دروازے کھول دے گا ۔ ہمیں مل کر سی پیک کے خلاف دشمن کی سازشوں کو ناکام بناناہوگا۔انہوں نے کہاکہ ہم تمام شہدائے کوئٹہ کے لیے مغفرت اور زخمیوں کے لیے شفائے کاملہ کی دعا کرتے ہیں ۔ ہماری ہمدردیاں مظلوم خاندانوں کے ساتھ ہیں ۔

وقت اشاعت : 09/08/2016 - 19:58:33

متعلقہ عنوان :

اپنی رائے کا اظہار کریں