سندھ حکومت کراچی سمیت صوبے بھر سے جانے والے قافلوں کو فول پروف سیکیورٹی فراہم کرے، علامہ نشان حیدر

بدھ 3 اگست 2016 22:45

کراچی(اُردو پوائنٹ اخبارتازہ ترین - آئی این پی۔3 اگست ۔2016ء) مجلس وحدت مسلمین پاکستان کے زیر اہتمام 7 اگست کو اسلام آباد میں ہونے والے تاریخی قومی اجتماع میں شرکت کیلئے ہزاروں کارکنان و عوام پر مشتمل کراچی ڈویژن کا قافلہ جمعہ کو روانہ ہوگا۔ تفصیلات کے مطابق مجلس وحدت مسلمین پاکستان کے زیر اہتمام 7 اگست کو شہید قائد علامہ عارف حسین کی برسی کے سلسلہ میں تاریخی قومی اجتماع "تحفظ پاکستان کانفرنس" کا انعقاد اسلام آباد میں کیا جا رہا ہے، جس میں ملک بھر سے ایک لاکھ سے زائد افراد شریک ہونگے۔

تحفظ پاکستان کانفرنس میں شرکت کیلئے علامہ نشان حیدر کی سربراہ میں ہزاروں کارکنان و افراد پر مشتمل ایم ڈبلیو ایم کراچی کا قافلہ جمعہ کو روانہ ہوگا۔ اس حوالے سے انتظامات کو حتمی شکل دے دی گئی ہے۔

(جاری ہے)

انتظامی امور کے حوالے سے وحدت ہاؤس کراچی میں ہونے والے ایک اجلاس سے خطاب میں علامہ نشان حیدر نے سندھ حکومت سے مطالبہ کیا کہ وہ اسلام آباد میں ہونے والی تحفظ پاکستان کانفرنس میں شرکت کیلئے کراچی سمیت سندھ بھر سے جانے والے قافلوں کو فول پروف سیکیورٹی کی فراہمی کو یقینی بنائیں۔ انہوں نے کہا کہ شہید قائد حسینی مسالک کے مابین اتحاد و یگانگت اور وطن کے استحکام کی علامت تھے، مجلس وحدت مسلمین انہی کے مشن کو لے کر آ گے بڑھ رہی ہے۔